Azərbaycan Tibb Universitetində Bilik Günü qeyd olunub

Bakı:

26 °C

69 %

10 m/s

Əlaqə

AZ RU EN

Ana səhifə / Sosial / Azərbaycan Tibb Universitetində Bilik Günü qeyd olunub

Azərbaycan Tibb Universitetində Bilik Günü qeyd olunub

16.09.2014 [09:39]

Dünən Azərbaycan Tibb Universitetində (ATU) “Bilik Günü” münasibətilə tədbir keçirilib. Tədbirdə çıxış edən ATU-nun rektoru, millət vəkili, akademik Əhliman Əmiraslanov bu əlamətdar günün əhəmiyyətindən danışıb, tələbə adını qazanan gəncləri, onların valideynlərini və müəllimləri yeni dərs ilinin başlanması münasibətilə təbrik edib.
Universitetin fəaliyyəti haqqında məlumat verən Ə.Əmiraslanov ATU-nu nəzdində onkoloji, tədris-terapevtik və stomatoloji klinikaların olduğunu, bir il əvvəl isə tədris-cərrahiyyə klinikasının istifadəyə verildiyini xatırladıb: “Bizim klinikaları görən xarici qonaqlar şəraitimizin Avropa klinikalarından heç də geri qalmadığını dəfələrlə vurğulayıblar. Hazırda təmirdə olan Onkoloji klinika üçün də yeni avadanlıqlar alınır. 400 çarpayılıq Tədris Terapevtik Klinikada universitetin 16 kafedrası yerləşir. Nisbətən yeni olan Tədris Cərrahiyyə Klinikamız 500 çarpayılıqdır və burada 20-dən artıq kafedra yerləşir”.
ATU nəzdində yeni klinikaların açılmasını Prezident İlham Əliyevin səhiyyə, tibb təhsili sahəsinə xüsusi qayğısı ilə əlaqələndirən Ə.Əmiraslanov bu addımların elm müəssisəsinin maddi-texniki bazasının möhkəmləndirilməsi və yüksəkixtisaslı tibb kadrlarının hazırlanmasında böyük köməyi olacağına əminliyini vurğulayıb.
Tədbirdə qeyd olunub ki, 2014/2015-ci tədris ilində ATU-ya 1022 nəfər qəbul olunub. Onlardan 957 nəfər həkim və hərbi həkim, 50 nəfər hərbi feldşer, 15 nəfər isə magistr ixtisasını seçib. Eyni zamanda, müqavilə əsasında 145 xarici tələbə hazırlıq şöbəsindən universitetin birinci kursuna qəbul olunub. Bu ilki qəbul imtahanlarında 600-dən çox bal toplamış 366 nəfər, 700 bal toplamış 2 nəfər ATU-da təhsil alacaq. Prezident təqaüdçülərinin sayı isə 25 nəfərdir.
Tədbirdə çıxış edən səhiyyə nazirinin müavini Elsevər Ağayev yeni dərs ilinin başlanması münasibətilə müəllim və tələbələri təbrik edib. E.Ağayev biliyin keyfiyyətli təhsildən keçdiyini vurğulayaraq bu sahədə dövlətin gördüyü işlərdən danışıb. Prezident İlham Əliyevin diqqət və qayğısı sayəsində əsaslı təmir olunmuş və yenidən tikilmiş tibb ocaqlarının sayının artıq 600-ə yaxınlaşdığını bildirən nazir müavini deyib ki, ən müasir avadanlıqlarla təchiz edilmiş bu müəssisələr gələcəyin kadrları olan indiki tələbələrin yolunu gözləyir.
Yeni Azərbaycan Partiyası (YAP) Nəsimi rayon təşkilatının sədri, partiyanın Siyasi Şurasının üzvü, Milli Məclisin deputatı Məlahət İbrahimqızı Azərbaycan təhsilinin və səhiyyəsinin infrastrukturunda əsaslı islahatlar aparıldığını qeyd edib. M.İbrahimqızı bildirib ki, bütün bu irəliləyişlərin kökündə Azərbaycanın daim artan iqtisadi gücü dayanır. “Dövlətimizin başçısı İlham Əliyevin siyasətinin əsasında milli maraqlarımız dayanır. Ona görə də, xalqımız bu siyasəti birmənalı şəkildə dəstəkləyir və Prezidentimizin ətrafında sıx birləşib.
Tədbirdə ATU-nun müalicə-profilaktika fakültəsinə 700 balla qəbul olmuş İlkin Məmmədzadə çıxış edərək daim bu ali təhsil ocağının adını ucaldacağına və müəllimlərinin etimadını doğruldacağına söz verib.
Sonda AMEA-nın müxbir və həqiqi üzvü adını qazanmış ATU əməkdaşlarına - Biofiziki və bioüzvi kimya kafedrasının müdiri Dilqəm Tağıyev, Mikrobiologiya kafedrasının müdiri Zakir Qarayev, I cərrahi xəstəliklər kafedrasının müdiri Nuru Bayramov, və Tibbi biologiya və genetika kafedrasının professoru İlham Şahmuradova hədiyyələr təqdim olunub.
N.BAYRAMLI

Paylaş:

Baxılıb: 1165 dəfə