Azərbaycanda qaçqın statusu verilmiş əcnəbilərin inteqrasiyası və sosial müdafiəsi məsələləri müzakirə edilib

Bakı:

26 °C

64 %

10 m/s

AZ RU EN

Ana səhifə / Sosial / Azərbaycanda qaçqın statusu verilmiş əcnəbilərin inteqrasiyası və sosial müdafiəsi məsələləri müzakirə edilib

Azərbaycanda qaçqın statusu verilmiş əcnəbilərin inteqrasiyası və sosial müdafiəsi məsələləri müzakirə edilib

23.05.2018 [09:35]

Dövlət Miqrasiya Xidmətində (DMX) Azərbaycanda qaçqın statusu verilmiş əcnəbilərin inteqrasiyası və sosial müdafiəsi məsələləri ilə bağlı fəaliyyət göstərən işçi qrupun iclası keçirilib.
DMX-nin mətbuat xidmətindən AZƏRTAC-a bildiriblər ki, iclasda Xidmətin rəhbərliyi, qaçqınların problemləri ilə əlaqəli olan müxtəlif dövlət qurumlarının məsul əməkdaşları, BMT-nin Qaçqınlar üzrə Ali Komissarlığının (BMT QAK) Azərbaycandakı nümayəndəliyinin rəhbəri, Azərbaycanla mobillik naminə tərəfdaşlığın həyata keçirilməsinə dəstək (MOBİLAZE)” layihəsinin milli əlaqələndiricisi və DMX yanında İctimai Şuranın üzvü iştirak ediblər.
İclasda Dövlət Miqrasiya Xidmətinin rəisi Vüsal Hüseynov işçi qrupunun hər görüşünün konkret nəticəsi olmasının zəruriliyini vurğulayaraq, üçüncü görüşdə də məhsuldar və faydalı müzakirələrin aparılacağına əminliyini ifadə edib. Xidmət rəisi qeyd edib ki, DMX işçi qrupunun fəaliyyətinə daim dəstək verəcək. Çünki həm dövlət qurumlarının, həm də beynəlxalq tərəfdaşların bu platformada təmsil olunması bizim üçün çox vacibdir.
Diqqətə çatdırılıb ki, üçüncü iclasın məqsədi qaçqın statusu verilmiş şəxslərin Azərbaycanda olacaqları müddətdə onlar üçün yaradılmış münbit şəraitin daha da təkmilləşdirilməsi, mövcud qanunvericilik aktlarında və beynəlxalq konvensiyalarda əksini tapan sosial-iqtisadi və insan hüquqlarının təşviq edilməsidir. V.Hüseynov deyib: “Elə bir mexanizm yaradılmalıdır ki, qaçqın statusu verilmiş şəxslərin məşğulluq məsələsində, sosial qayğılarının diqqətdə saxlanımasında dövlətlə yanaşı, beynəlxalq tərəfdaşlar və vətəndaş cəmiyyəti institutları da yaxından iştirak etsinlər”.
Xidmət rəisi vurğulayıb ki, indiyədək DMX-nin rəhbərliyi ilə işçi qrupunun “Azərbaycanda qaçqınların əmək bazarına və sosial təminat sisteminə çıxışı” və “Yol sənədi və qaçqın vəsiqəsi ilə bağlı” mövzularda iki iclası keçirilib. Bugünkü iclasda isə “Azərbaycanda qaçqın statusu almış şəxslərin sosial-iqtisadi hüquqlarının təmin edilməsi istiqamətində əldə olunmuş uğurlar və qaçqınların inteqrasiya siyasətinə dair “Yol xəritəsi” üçün tövsiyələr” adlı sənəd müzakirə edilir.
Xatırladaq ki, “Yol xəritəsi” sənədində Azərbaycanda qaçqınların inteqrasiyası üçün yaşayış sahəsi ilə təmin olunma imkanı, təhsilə çıxış imkanı, əmək bazarına çıxış imkanı və mədəniyyətlərarası dialoqun genişləndirilməsi olmaqla dörd əsas sahə müəyyənləşdirilib.
BMT QAK-ın Azərbaycandakı nümayəndəliyinin rəhbəri Furio De Angeles bildirib ki, müzakirə olunan mövzuya çoxtərəfli yanaşma tələb olunur. Qaçqın mövzusu qlobal proses olduğu üçün biz beynəlxalq diqqətin bu məsələyə yönəldilməsinə və dünyada bu sahə ilə bağlı yaxşı təcrübənin Azərbaycana gətirilməsinə dəstək verəcəyik. O, bu həssas kateqoriyadan olan insanlara göstərilən münasibəti və iclasda müzakirə edilən sənədin əhəmiyyətini vurğulayıb.
Azərbaycan ilə mobillik naminə tərəfdaşlığın həyata keçirilməsinə dəstək (MOBİLAZE)” layihəsinin milli əlaqələndiricisi Elnur Nəsibov “Yol xəritəsi” barədə təqdimatla çıxış edib.
Sonra mövzu ətrafında müzakirələr aparılıb.
Qeyd edək ki, Nazirlər Kabinetinin müvafiq tövsiyəsinə uyğun olaraq, Azərbaycanda qaçqın statusu verilmiş əcnəbilərin inteqrasiyası və sosial müdafiəsi məsələləri ilə bağlı 2016-cı ilin sonlarında müvafiq dövlət qurumlarının nümayəndələrindən ibarət işçi qrupu yaradılıb. İşçi qrupunun tərkibinə Dövlət Miqrasiya Xidmətinin rəhbərliyi, Nazirlər Kabineti Aparatının, Xarici İşlər, Daxili İşlər, Ədliyyə, Vergilər, İqtisadiyyat, Əmək və Əhalinin Sosial Müdafiəsi, Təhsil, Səhiyyə, Maliyyə nazirliklərinin, Dövlət Təhlükəsizliyi Xidmətinin səlahiyyətli nümayəndələri daxildir.

Paylaş:

Baxılıb: 810 dəfə