Pandemiya dövründə əhalinin sağlamlığının və təhlükəsizliyinin qorunması yönündə Azərbaycan polisi mühüm funksiya yerinə yetirir

Bakı:

28 °C

44 %

1 m/s

AZ RU EN

Ana səhifə / Sosial / Pandemiya dövründə əhalinin sağlamlığının və təhlükəsizliyinin qorunması yönündə Azərbaycan polisi mühüm funksiya yerinə yetirir

Pandemiya dövründə əhalinin sağlamlığının və təhlükəsizliyinin qorunması yönündə Azərbaycan polisi mühüm funksiya yerinə yetirir

11.06.2020 [09:23]

Ekspertlər bildirirlər ki, xüsusi karantin rejimi şəraitində həyata keçirilən tədbirlərin icrası zamanı polis əməkdaşlarına müqavimət göstərilməsi, onlara qarşı qanunazidd hərəkətlər edilməsi yolverilməzdir
Məlum olduğu kimi, yeni növ koronavirus (COVID-19) infeksiyasının ölkəmizdə geniş yayılmasının qarşısının alınması istiqamətində görülən işlər öz müsbət nəticəsini verib. Belə ki, dünyanın bir sıra inkişaf etmiş ölkələri ilə müqayisədə Azərbaycanda daha ciddi uğurlar əldə olunub. Lakin karantin rejiminin yumşaldılması dövründə yeni növ koronavirus infeksiyasına yoluxma hallarının artması müşahidə edilir ki, bu da məhdudlaşdırıcı tədbirlərin yenidən sərtləşdirilməsi zərurətini gündəmə gətirib. Nazirlər Kabinetinin xüsusi karantin rejiminin sərtləşdirilməsi ilə bağlı əlavə tədbirlər barədə qərarına əsasən, ötən həftənin şənbə və bazar günləri Bakı, Sumqayıt, Gəncə, Lənkəran şəhərləri və Abşeron rayonunda əhalinin yaşayış yerlərini və ya olduğu yerləri tərk etməsi qadağan edilib. Təbii ki, sözügedən qərarın icrasını yüksək səviyyədə təmin etmək üçün Azərbaycan polisi ona tapşırılan vəzifəni peşəkarlıqla yerinə yetirib və sərt karantin rejiminin tələblərini pozanlara qarşı müvafiq tədbirlər də görülüb. Lakin bəzi radikal müxalifət təmsilçiləri karantin rejiminin sərtləşdirilməsini sabotaj etməyə cəhdlər göstərir, vətəndaşları polis əməkdaşlarına qarşı çıxmağa səsləyirlər.
Məsələyə münasibət bildirən Milli Məclisin deputatı Ceyhun Məmmədovun sözlərinə, pandemiya dövründə əhalinin sağlamlığının qorunması və koronavirusun yayılmasının qarşısının alınması üçün həyata keçirilən tədbirlərin icrası sahəsində Azərbaycan polisi mühüm funksiya yerinə yetirir: “Son vaxtlar Azərbaycanın bir çox dövlət qurumları gərgin rejimdə fəaliyyət göstərir. Bu dövlət qurumlarının ən çox əziyyət çəkən, ağır yük daşıyan işçiləri sırasında Daxili İşlər Nazirliyinin əməkdaşlarını da göstərmək olar”.
Pandemiya dövründə polis əməkdaşlarının həddindən artıq fədakarlıq nümayiş etdirdiyini vurğulayan deputat deyib ki, ictimai asayişi qoruyan, öz vəzifəsini yerinə yetirən polisə müqavimət göstərilməsi, polis əməkdaşlarının təhqir olunması, onlara qarşı qanunazidd hərəkətlər edilməsi yolverilməzdir.
Bəzi radikal müxalifət təmsilçilərinin xüsusi karantin rejiminin sərtləşdirilməsini sabotaj etmək yönündə uğursuz cəhdlərinə də toxunan C.Məmmədov bildirib ki, vətəndaşları öz vəzifələrini yerinə yetirən polis əməkdaşlarına qarşı çıxmağa səsləmək dövlətçiliyimizə qarşı təxribatdır: “Biz dövlətçiliyi müdafiə etməli, dövlətin yanında olmalıyıq. Müəyyən qüvvələrin bu hadisələri körükləməkdə və insanları qızışdırmaqda məqsədi isə ölkədə sabitliyi pozmaqdır. Bu gün bizə həmrəylik və birlik lazımdır. Polis də, müəllim də, həkim də bizimdir, onlara sahib çıxmalıyıq”.
Milli Məclisin deputatı Kamran Bayramov isə deyib ki, hər zaman dövlətimizin və xalqımızın maraqlarının keşiyində duran Azərbaycan polisi çox zəngin və keşməkeşli tarix yolu keçib: “Polislərin peşəkar fəaliyyəti nəticəsində ölkədə kriminogen vəziyyət nəzarətdə saxlanılır, cinayətlərin qarşısının alınması və üstünün açılması istiqamətində yüksək nəticələr əldə edilib, cəmiyyətimizin polis orqanlarına inamı və etibarı xeyli artıb”.
Koronavirus pandemiyası dövründə də Azərbaycan polisinin öz üzərinə düşən vəzifələri yüksək peşəkarlıqla və vicdanla icra etdiyini qeyd edən K.Bayramovun sözlərinə görə, polis əməkdaşları bu ağır şəraitdə vətəndaşların sağlamlığının və təhlükəsizliyinin qorunması üçün əllərindən gələni əsirgəmirlər: “Bu dönəmdə, ötən həftənin son iki günü ərzində ölkəmizdə tətbiq edilmiş sərtləşdirilmiş karantin rejimi dövründə də polis əməkdaşları fədakarcasına fəaliyyət göstəriblər. Lakin bəzi şəxslər tərəfindən onlara qarşı bir sıra xoşagəlməz, təxribat xarakterli davranış halları baş versə də, bu cəhdlər vətəndaşlarımızın polis əməkdaşlarına olan inamına və etibarına heç zərrə qədər də xələl gətirə bilmədi. Düşünürəm ki, heç bir təxribat polisimizin cəmiyyətdə olan nüfuzunu sarsıda bilməz”.
Qaşqay

Paylaş:

Baxılıb: 396 dəfə