Sosial media “doktor”ları...

Bakı:

23 °C

52 %

4 m/s

Əlaqə

AZ RU EN

Ana səhifə / Sosial / Sosial media “doktor”ları...

Sosial media “doktor”ları...

27.07.2023 [11:55]

Diplom əvəzinə reklam

Sosial şəbəkələr gündəlik həyatımızın bir parçasıdır. Təbii olaraq hər bir istifadəçi internetdən öz maraqlarına uyğun yararlanır. Kimisi işlə, kimisi özünüreklamla bağlı, kimisi də sadəcə vaxt “öldürmək” üçün...

Son vaxtlar sosial şəbəkələrdə həkim reklamlarının sayı artıb. Xüsusilə də Feysbukda bəziləri adlarının qarşısına “Dr” yazaraq özlərini “həkim” kimi təqdim edirlər. Məsələnin dərinliyinə gedəndə isə bəlli olur ki, həmin şəxslər heç tibb texnikumunu belə bitirməyiblər. Təbii ki, bu “həkim”lər onlara müraciət edənlər üzərindən apardığı reklam kampaniyaları ilə daha çox pasiyent cəlb etməyə çalışırlar. Ancaq cəmi 6 aylıq, uzağı 1 illik kurslara gedib sertifikat əldə etməklə həkim adını qazanmaq absurd, yanlış, bir o qədər də təhlükəli durumdur. Çünki söhbət insan həyatından gedir. Təsadüfi deyil ki, çoxsaylı insan sosial şəbəkə üzərindən tanıdığı “doktor”lara müraciət etdikdən sonra ciddi sağlamlıq problemilə üzləşiblər.

Qəribəsi odur ki, anatomiyanı bilməyən, müxtəlif yollarla sertifikatlar alan, dərin savada malik olmayan “həkim”lərin qəbuluna getsəniz, düşə bilməyəcəksiniz. Bu gün insanlarda sanki falçılıq təfəkkürü var. Sosial şəbəkələr, televiziyalar, radiolarda həmin “həkimlər”in reklamı gedir. Efirlərdə elə həkimlər reklam olunur ki, adam baxmağa utanır: “Bir nömrəli həkim”, “Dünyada analoqu olmayan doktor”. Təqdimatın özü belə gülüş doğurur. Amma bu cür reklam işbaz həkimlərin xeyrinə işləyir.

Təbabətin “ulduzları” yetişir

Mövzu barədə fikirlərini “Yeni Azərbaycan”la bölüşən psixoloq Aynur Ələkbərova bildirib ki, bu gün sosial şəbəkələr, bəzi TV verilişləri insanların beyninə asanlıqla təsir göstərir. Onun sözlərinə görə, bəzi “həkim”lərın özünü sosial mediada reklam etməsinin əsasında korporativ maraqlar dayanır: “Təəssüf ki, insanlar buna inanır və reklamlara uyurlar. Sosial şəbəkələrdə hər gün bir “həkim” reklamı qarşımıza çıxır. Reklam olunan da ona etimad edənlərin üzərində eksperiment apara-apara “həkim”ə çevrilir və olur “təbabətin ulduz”u. Bu gün kifayət qədər “təbabət ulduzları” yetişir. Əsl həkim bunu özünə rəva görməz”.

Qadağan olunmalıdır!

Psixoloqun qənaətincə, həkimlərin, dərmanların, tibb müəssisələrinin reklamı tamamilə qadağan olunmalıdır: “Hansısa həkim çıxıb deyir ki, “bu mənim öz müalicə üsulumdur”. Lakin bu doğru yanaşma deyil. 20 ildən çoxdur ki, Amerikada robot cərrahlığı tətbiq olunur. Həkim otaqda oturur, əməliyyatı robot icra edir. Bizdə heç robot yoxdur. Utanmaq lazımdır. Bütün bunların hamısı cəmiyyətə hesablanan reklamlardır ki, bu sahədə xeyli uğur əldə edirlər”.

Həkimlik başdan-ayağa kommersiyaya çevrilib

Sosioloq Sahib Altayın fikrincə, heç bir halda sosial şəbəkələrdəki “doktor”ların paylaşımlarını, yaxud da onların efirə çıxmasını reklama çevirməməliyik: “Əlbəttə özlərinə “həkim” deyən şəxslər maraqlıdırlar ki, çıxıb efirdə danışsınlar və yaxud Feysbuk, İnstaqram kimi sosial şəbəkələrdə özlərini reklam etsinlər. Bu zaman onların müştəriləri də artır. Yəni birbaşa kommersiya maraqlarını güdürlər. Cəmiyyətdə xəstəlik kifayət qədər çoxdur, insanlar baxa bilər və həmin “həkim”lər müştəri qazanar. Amma bütün bunlar heç bir halda vətəndaşı aldatmağa yönəlməli deyil”.

Sosioloq qeyd edib ki, başqa ölkələrdə həkimlər 40 yaşına kimi müstəqil müalicə hüququna malik olmurlar: “Amma bizdə baxırsan ki, cavan adamdı və tibb elmləri doktoru adını alıb. Həkimlik təcrübə ilə bağlıdır. Təkcə bilgi ilə bu işin öhdəsindən gəlmək olmaz. Bilgilərin isə hansı səviyyədə olması ayrı mövzudur. Çünki bizim bir çox həkimlər Türkiyəyə can atırlar ki, filan tibbi prosedurları mənimsəsin, çünki orada yaxşı pul var. Həkimlik başdan-ayağa bir kommersiyaya çevrilib. Bu halda televiziya belə nüanslara çox ciddi diqqət yetirməlidir. Tibb Universitetində bir xanım tanıyırdım ki, 35 yaşı yoxdur, amma tibb elmləri doktoru, professordur. Xaricdə belə halları ağıla gətirmək olmaz, çünki bu, mümkün deyil. Bütün bunlar sağlamlığımıza böyük təhlükədir. İnsanlar bilməlidir ki, həkimlik bəlli bir yaşdan sonra müstəqil fəaliyyət sahəsidir. Ona görə də həkimlərin özünü sosial şəbəkələrdə reklam etməsi cəmiyyətdə bu peşə ilə bağlı yanlış təsəvvür yaradır”.

Y.BAYRAMOVA

Paylaş:

Baxılıb: 607 dəfə