"28 May – Müstəqilliyin Zəfəri və Qüruru"

Bakı:

22 °C

66 %

5 m/s

Əlaqə

AZ RU EN

Ana səhifə / YAP xəbərləri / "28 May – Müstəqilliyin Zəfəri və Qüruru"

"28 May – Müstəqilliyin Zəfəri və Qüruru"

27.05.2025 [19:09]

28 May – Respublika Günü şanlı tariximizə qızıl hərflərlə həkk olunmuş, hər bir Azərbaycan vətəndaşının qürur mənbəyi olan bir gündür. 1918-ci il mayın 28-də mürəkkəb siyasi hərbi-şəraitdə əsarət altında yaşayan, tarixi, mədəniyyəti, dili, dini sıxışdırılan Azərbaycan xalqı özünün və Şərqin ilk demokratik, hüquqi, dünyəvi və parlamentli respublikasını yaradıb. Avropanın demokratik dəyərləri ilə Şərq mədəniyyətinin xüsusiyyətlərini özündə birləşdirən Azərbaycan Xalq Cümhuriyyəti xalqımızın milli və siyasi şüurunun, yüksək mədəniyyətinin nəticəsi idi. Cümhuriyyətin ömrü uzun olmasa da, qısa bir müddət - 23 ay ərzində çox böyük işlər gördü. Belə ki, dövlət bayrağı, dövlət himni və gerbi, Azərbaycan vətəndaşlığı təsis edildi, milli ordu yaradıldı. Həmin dövr üçün olduqca mütərəqqi sayılan müddəaları özündə əks etdirən çoxsaylı qanunlar qəbul edildi. XX əsrin sonlarında müstəqilliyinə yenidən qovuşan Azərbaycan suverenliyini qoruyub saxlamağı bacardı. Həmin dövrdə Ermənistanın Azərbaycan torpaqlarına təcavüzü bir tərəfdən, daxili münaqişələr digər tərəfdən ölkəni çətin bir vəziyyətə salmışdı. Məhz belə bir şəraitdə hakimiyyətə gələn Heydər Əliyev dövlətimizin və dövlətçiliyimizin xilaskarı oldu. Azərbaycan xalqı da bu dahi şəxsiyyətə və Azərbaycanı ən ağır vəziyyətdən Heydər Əliyevin çıxara biləcəyinə inanırdı. Heydər Əliyev bütün fəaliyyəti dövründə xalqına arxalanmışdır. Ulu öndər hakimiyyətə qayıdışı ilə xilaskarlıq missiyasını uğurla yerinə yetirərək Azərbaycanın müstəqilliyinin daimiliyini, sarsılmazlığını təmin etmək üçün möhkəm təməl yaratdı. İqtisadiyyatın inkişafında neft amilinə böyük önəm verməsi iqtisadi inkişafı təmin etməklə, digər sahələrin də tərəqqisini sürətləndirməyi şərtləndirdi. Əhalinin sosial müdafiəsi gücləndirildi, demokratik cəmiyyətin varlığını təsdiqləyən bütün atributlar bərqərar olundu, sülh danışıqlarını cəsarətlə aparmaq üçün ordu quruculuğu sahəsində təxirəsalınmaz tədbirlər həyata keçirildi. 1995-ci ildə müstəqil dövlətin Azərbaycanın diplomatik mübarizədə qələbəsini təmin etmək üçün möhkəm hüquqi baza formalaşdırıldı.

“Əsrin əvvəlində – 1918-ci ildə Azərbaycan xalqı öz müstəqilliyinə nail ola bildi, xalq cümhuriyyəti yarandı. Azərbaycanda Şərq aləmində ilk dəfə demokratik, hüquqi dövlət yarandı. Ən mühümü odur ki, Azərbaycanın müstəqilliyinin, dövlətçiliyinin əsaslarını qurdu, Azərbaycan dövlətinin, hökumətinin təsisatlarını yaratdı” söyləyən Ulu öndər Heydər Əliyev onu da bildirmişdir ki, 28 May Azərbaycan xalqı üçün əziz gündür. Çünki 1918-ci ildə məhz 28 Mayda Azərbaycanın qabaqcıl insanları Azərbaycanın müstəqilliyi haqqında istiqlal bəyannaməsini qəbul ediblər və ondan sonra da Azərbaycan Xalq Cümhuriyyəti qurulubdur. Ümummilli Lider bu mühüm məqamı da xüsusi vurğulamışdır ki, Azərbaycan dövləti, müstəqil Azərbaycan Respublikası 1918-ci ildə yaranmış Xalq Cümhuriyyətinin varisidir. Ulu öndər Heydər Əliyev siyasətini uğurla davam etdirən Prezident İlham Əliyev Azərbaycanı möhkəm təməl üzərində uğurla inkişaf etdirərək Zəfərlərə aparır. 21 ildən artıq dövrdə qazandığımız uğurların zirvəsi tarixi Zəfərimiz, ərazi bütövlüyümüzün və suverenliyimizin tam bərpa edilməsidir. 44 günlük İkinci Qarabağ müharibəsində Azərbaycan Ordusunun qəhrəmanlığı sayəsində tarixi ədalət bərpa olundu, işğala son qoyuldu. Dövlətimizin başçısı, Müzəffər Ali Baş Komandan İlham Əliyev qalib ölkənin qalib Lideri olduğunu əməli ilə təsdiqlədi, ata vəsiyyətini yerinə yetirdi və bununla xoşbəxtliyini xalqına əminliklə çatdırdı. Ötən ilin sentyabr ayında Azərbaycan Ordusunun həyata keçirdiyi bir günlük antiterror tədbirləri nəticəsində suverenliyimiz tam təmin edildi. İlk dəfə müstəqillik tarixində Azərbaycanın suverenliyi və ərazi bütövlüyü bərqərar olundu.

Prezident İlham Əliyev öz çıxışlarında dəfələrlə Xalq Cümhuriyyətinin siyasi və mənəvi varisi olan müasir müstəqil Azərbaycanın ənənəvi dövlətçilik ideyalarını davam etdirəcəyini, ölkəmizin müstəqilliyinin əbədi olacağını bəyan edib.

Cənab Prezidentin Azərbaycan Xalq Cümhuriyyətinin 90 illik yubileyi, həmçinin Cümhuriyyətin 100 illik yubileyinin keçirilməsi haqqında sərəncamları milli yaddaşın formalaşması prosesində mühüm əhəmiyyət kəsb edir. Bu gün Prezident İlham Əliyevin rəhbərliyi ilə Azərbaycan Respublikasında demokratik, hüquqi, dünyəvi dövlət, vətəndaş cəmiyyəti quruculuğu prosesi, siyasi, iqtisadi və sosial islahatlar uğurla həyata keçirilir, ölkə iqtisadiyyatı dönmədən inkişaf etdirilir, əhalinin sosial müdafiəsinin gücləndirilməsi üçün əsaslı tədbirlər görülür.

Fidan Hüseynova,

YAP Quba rayon təşkilatının sədri

Paylaş:

Baxılıb: 524 dəfə