Qardaşlığın, dostluğun, birliyin təzahürü

Bakı:

24 °C

42 %

3 m/s

Əlaqə

AZ RU EN

Ana səhifə / YAP xəbərləri / Qardaşlığın, dostluğun, birliyin təzahürü

Qardaşlığın, dostluğun, birliyin təzahürü

17.06.2025 [22:23]

Dörd il əvvəl Türk dünyasının qədim mədəniyyət beşiyi olan Şuşa şəhərində Prezident İlham Əliyev və Prezident Rəcəb Tayyib Ərdoğan “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi”ni imzaladılar. Xalqlarımızın böyük liderləri Mustafa Kamal Atatürkün və Heydər Əliyevin müdrik kəlamlarının əks tapdığı Bəyannamə iki dost və qardaş dövlətlərin gələcək fəaliyyətləri üçün əsas amildir.

Qeyd etmək lazımdır ki, digər müqavilələrdən fərqli olaraq Şuşa Bəyannaməsi iki qardaş ölkədə həyatın bütün sahələrini əhatə etməsi ilə fərqlənir. Ölkələrimiz arasındakı müttəfiqlik əlaqələri siyasət, beynəlxalq müstəvidə birgə əməkdaşlıq, iqtisadiyyat, enerji təhlükəsizliyi, nəqliyyat, mədəniyyət, təhsil, ordu quruculuğu və digər strateji sahələri əhatə edir.

Şuşa Bəyannaməsi eyni zamanda regionda sülhün və sabitliyin təmin olunmasına yönəlib. Bəyannamənin hərbi hissəsində iki ölkənin orduları arasında qarşılıqlı fəaliyyət, birgə təlimlər və informasiya mübadiləsi kimi önəmli bəndlər yer alıb. Şuşa Bəyannaməsinin müddəaları Azərbaycan Respublikasının milli təhlükəsizliyinin bir çox aspektini əhatə etsə də, Hərbi Doktrinada nəzərdə tutulan xarici hərbi və siyasi təhdidlərin neytrallaşdırılmasında və ya onlara qarşı balans yaradılmasında xüsusi əhəmiyyət kəsb edir. Beləliklə, bir dövlətin təhlükəsizliyinin, ərazi bütövlüyünün təhdid edilməsi digəri üçün də təhdid kimi qəbul edilir və lazımi tədbirlərin həyata keçirilməsi öhdəçiliyini yaradır. Azərbaycan və Türkiyə hər zaman bir yerdə olacaq və bir-birinin təhlükəsizliyini təmin edəcək. Bu isə eyni zamanda bütün Cənubi Qafqazda sülhə və təhlükəsizliyə zəmanət deməkdir.

Analitiklərin fikrincə bu vacib sənəd əraziyə yeni sərmayə qoyuluşu prosesini stimullaşdırmaqla, regionun artan investisiya potensialının artmasına və yeni iqtisadi münasibətlərin formalaşmasına geniş imkan yaratdı və Şuşada gözəl turizm imkanlarının açılmasına səbəb oldu. Müdafiə sahəsində əməkdaşlıq və qarşılıqlı hərbi yardım məsələlərinin Bəyannamədə əks olunması isə tarixi nailiyyətdir. Müdafiə sənayesi sahəsində əlaqələrin inkişafı ölkələrin hərbi qüdrətini artıracaqdır. İki ölkənin silahlı qüvvələrinin birlikdə fəaliyyət qabiliyyətinin artırılması, müasir texnologiyalara əsaslanan silah və sursatların idarə olunmasında sıx əməkdaşlığı və bu məqsədlə səlahiyyətli struktur və qurumların əlaqəli fəaliyyətinin təmin edilməsinin təşviq olunması ilə bağlı da razılığa gəlinməsi çox mühüm nəticələrə gətirib çıxracaqdır.

Bəli, Azərbaycan və Türkiyə 15 iyun 2021-ci ildə tarixi addım ataraq, bölgənin geosiyasi mənzərəsini dəyişəcək Bəyannaməyə imza atdı. Şuşa Bəyannaməsi Azərbaycanı və Türkiyəni istəməyənlərə, iki dost, qardaş ölkənin sürətli inkişafını gözü götürməyən qüvvələrə tutarlı mesajdır. Azərbaycan və Türkiyə hər zaman bir yerdə olacaqdır.

Rövşən Qayayev,
YAP Qazax rayon təşkilatının məsləhətçisi

Paylaş:

Baxılıb: 291 dəfə