Azərbaycan müasir inkişaf yoluna qədəm qoyduğu son iyirmi il ərzində bir çox sahələrdə möhtəşəm nailiyyətlər qazanmışdır

Bakı:

24 °C

69 %

10 m/s

AZ RU EN

Ana səhifə / YAP xəbərləri / Azərbaycan müasir inkişaf yoluna qədəm qoyduğu son iyirmi il ərzində bir çox sahələrdə möhtəşəm nailiyyətlər qazanmışdır

Azərbaycan müasir inkişaf yoluna qədəm qoyduğu son iyirmi il ərzində bir çox sahələrdə möhtəşəm nailiyyətlər qazanmışdır

02.07.2025 [18:25]

Bu uğurların içində elə bir sahə var ki, onun inkişafı təkcə iqtisadiyyata deyil, Azərbaycanın müstəqilliyinə, təhlükəsizliyinə və beynəlxalq nüfuzuna da birbaşa təsir göstərmişdir. Bu, enerji sektorudur. Prezident İlham Əliyevin Mingəçevirdə “8 Noyabr” Elektrik Stansiyasının açılış mərasimində dediyi kimi: “Biz son 20 il ərzində Azərbaycanın energetika sistemini demək olar ki, sıfırdan qurmuşuq.” Bu cümlə sadə görünə bilər, amma arxasında böyük zəhmət, siyasi iradə və strateji baxış dayanır. 2003-cü ildən bu günə qədər keçən yol nəinki infrastrukturun yenilənməsi, köhnə enerji avadanlıqlarının təmir olunması və ya generasiya gücünün artırılması ilə yadda qaldı. Bu yol - dağıdılmış, bərbad vəziyyətdə olan enerji təsərrüfatının sıfırdan, mərhələli və planlı şəkildə qurulması, Azərbaycanı bu sahədə bölgənin aparıcı gücünə çevirmək yolu idi. Həmin mərasimdə Prezident haqlı olaraq qeyd etdi ki, müstəqilliyimizin ilk illərində ölkənin enerji təsərrüfatı tamamilə iflic olmuşdu. Enerji təchizatında kəskin problemlər yaşanır, insanlar, fabriklər, məktəblər, xəstəxanalar qaranlıqda qalırdı. Azərbaycan sanki bir enerji ölkəsi deyilmiş kimi yaşayırdı. Bu vəziyyəti kökündən dəyişən əsas amil məhz siyasi iradə oldu. Prezident İlham Əliyev çıxışında bu dönüş nöqtəsini xatırladaraq dedi ki, son 20 ildə 38 elektrik stansiyası tikilmişdir və bu stansiyaların generasiya gücü 3300 meqavatdan çoxdur. Bu rəqəmlər təkcə texniki göstəricilər deyil – bunlar işıqla dolan evlər, güc qazanan sənaye müəssisələri, sabitlik və rifah deməkdir. Bu gün Azərbaycanın enerji sistemi elə bir səviyyəyə çatıb ki, biz artıq öz ehtiyaclarımızı tam ödəməklə yanaşı, qonşu ölkələrə də enerji ixrac edirik. Özü də nəinki enerji ixrac edirik, həm də bunu müasir texnologiyalar, ekoloji standartlara uyğun, dayanıqlı şəkildə edirik. “8 Noyabr” Elektrik Stansiyasının istifadəyə verilməsi həm simvolik, həm də strateji əhəmiyyət daşıyır. Simvolikdir, çünki bu stansiyanın adı şanlı Zəfər Günümüz – 8 Noyabr ilə bağlıdır. Prezidentin dediyi kimi, bu, təsadüfi deyil. Müzəffər Ordumuzun qəhrəmanlığı ilə azad edilən torpaqlarımızda dövlətimizin bərpa və quruculuq ruhu enerji layihələrində də öz əksini tapır. Stratejidir, çünki bu stansiya Azərbaycanın enerji təhlükəsizliyinə və ixrac potensialına ciddi töhfə verir. Stansiyanın tikintisi cəmi 1 il 9 aya başa çatdırılıb. Bu, rekord göstəricidir. Prezident çıxışında qeyd etdi ki, bu stansiya təkcə generasiya gücü ilə deyil, həm də sərfəli və çevik texnologiyası ilə fərqlənir. Saatda 1280 ton az qaz sərf edərək 1 milyard kubmetr qazın qənaət edilməsinə imkan verir ki, bu da həm iqtisadi baxımdan səmərəli, həm də ekoloji cəhətdən davamlı yanaşmanın nümunəsidir. Prezident İlham Əliyevin vurğuladığı digər mühüm məqam isə budur: “Energetika sistemimiz strateji sahə kimi daim diqqət mərkəzində olub.” Bu gün Azərbaycan təkcə neft və qaz ixrac edən ölkə deyil, həm də elektrik enerjisi ilə Avropa bazarına çıxış əldə edən, “yaşıl enerji” potensialını inkişaf etdirən bir dövlətdir. Bu xüsusda Qarabağ və Şərqi Zəngəzurun “yaşıl enerji zonası” elan edilməsi və orada həyata keçirilən layihələr ölkənin enerji siyasətinin gələcəyə hesablanmış planlı inkişafının göstəricisidir. Azərbaycanın enerji strategiyası təkcə ölkə daxilində deyil, beynəlxalq miqyasda da yeni əməkdaşlıq üfüqləri açır. Prezident çıxışında bunu da bildirdi: “Biz bu gün Avropaya elektrik enerjisi ixrac edirik və bu ixrac artır.” Azərbaycan Cənub Qaz Dəhlizi ilə qaz nəql etdiyi kimi, yüksək gərginlikli xətlər vasitəsilə Avropanın enerji təhlükəsizliyinə də töhfə verir. Bu, təkcə iqtisadi deyil, siyasi əhəmiyyət daşıyan məsələdir. Bu enerji körpüləri Azərbaycanı regionda etibarlı tərəfdaş, sabitlik adası və enerji qovşağına çevirir. Prezidentin çıxışındakı sadə, amma çox dərin bir cümlə var idi: “Əgər biz bu işləri görməsəydik, bu gün ölkəmiz böyük çətinliklərlə üzləşə bilərdi.” Həqiqətən də, bu gün dünyada enerji böhranları, qiymət dalğalanmaları, geosiyasi gərginliklər fonunda Azərbaycanın sabit enerji sistemi, özünütəmin etmə bacarığı və ixrac imkanları ölkəyə güc, təhlükəsizlik və nüfuz qazandırır. Bütün bunlar bir daha sübut edir ki, enerji sahəsində son 20 ildə görülən işlər gələcəyə atılmış strateji addımlar idi və bu addımların bəhrəsini bu gün bütün ölkə görür. “8 Noyabr” Elektrik Stansiyasının açılış mərasimi sadəcə texniki bir obyektin istifadəyə verilməsi deyildi. Bu, Azərbaycanın müasir tarixinin, dövlət quruculuğunun, iqtisadi inkişafının və milli qürurunun bir simvoluna çevrildi. Prezident İlham Əliyevin dediyi kimi, enerji sektoru bizim üçün milli təhlükəsizlik məsələsidir. Bu baxımdan, son 20 ildə sıfırdan qurulan energetika sistemi təkcə texniki nailiyyət deyil, həm də siyasi uzaqgörənlik və dövlətçilik qətiyyətinin parlaq nümunəsidir.

Şəbnəm Uğurlu,

Yeni Azərbaycan Partiyası Laçın rayon təşkilatının 54 saylı ƏPT-nin sədri

Laçın şəhər 2 nömrəli tam orta məktəbin direktor müavini

Paylaş:

Baxılıb: 442 dəfə