Prezident İlham Əliyev və Sercio Mattarellanın görüşü – Azərbaycan-İtaliya münasibətlərində yeni strateji mərhələ

Bakı:

22 °C

56 %

6 m/s

AZ RU EN

Ana səhifə / YAP xəbərləri / Prezident İlham Əliyev və Sercio Mattarellanın görüşü – Azərbaycan-İtaliya münasibətlərində yeni strateji mərhələ

Prezident İlham Əliyev və Sercio Mattarellanın görüşü – Azərbaycan-İtaliya münasibətlərində yeni strateji mərhələ

08.10.2025 [12:24]

Sentyabrın 30-da Azərbaycan Respublikasının Prezidenti İlham Əliyev və İtaliya Respublikasının Prezidenti Sercio Mattarella arasında baş tutan görüş iki ölkə arasında münasibətlərin inkişafında mühüm siyasi hadisə kimi tarixə düşdü. Görüş zamanı dövlət başçıları Azərbaycan və İtaliya arasında strateji tərəfdaşlıq münasibətlərinin uğurlu inkişafından, qarşılıqlı etimadın və dostluğun daha da möhkəmlənməsindən məmnunluq ifadə etdilər.

Prezident İlham Əliyev bəyanatında bildirdi ki, İtaliya Azərbaycanın Avropadakı ən yaxın tərəfdaşlarından biridir və bu əməkdaşlıq uzun illərin sınağından keçərək real nəticələr vermişdir. İki ölkə arasında enerji, sənaye, nəqliyyat, mədəniyyət və təhsil sahələrində imzalanmış çoxsaylı sazişlər bu münasibətlərin dərin köklərə malik olduğunu təsdiqləyir.

Prezident İlham Əliyev vurğuladı ki, Azərbaycan və İtaliya arasında strateji tərəfdaşlıq bəyannamələri münasibətlərimizin möhkəm hüquqi bazasını təşkil edir. Ölkələrimizi birləşdirən əsas sahələrdən biri enerji əməkdaşlığıdır. Azərbaycan qazının Trans-Adriatik boru kəməri (TAP) vasitəsilə İtaliyaya və Avropaya nəql olunması iki dövlətin siyasi iradəsinin, qarşılıqlı etimad və dostluq əlaqələrinin bariz göstəricisidir. Prezident İlham Əliyev qeyd etdi ki, bu layihə təkcə enerji deyil, həm də regional təhlükəsizlik və iqtisadi inteqrasiyanın əsas dayaqlarındandır.

Görüş zamanı həmçinin təhsil və mədəni əməkdaşlığın önəmi vurğulandı. Prezident İlham Əliyev İtaliya-Azərbaycan Universitetinin açılışını xüsusi qeyd edərək bildirdi ki, bu ali təhsil ocağı iki ölkə arasında dostluğun, mədəni yaxınlığın və gələcək nəsillər üçün elmi körpünün simvoluna çevriləcək. Bu universitet, eyni zamanda, Avropa ilə Azərbaycanın elmi-humanitar sahədə inteqrasiyasına yeni imkanlar açır.

İtaliya Prezidenti Sercio Mattarella çıxışında Azərbaycanın regionda oynadığı mühüm rolu yüksək qiymətləndirdi. O qeyd etdi ki, ölkələrimiz arasında əlaqələr qarşılıqlı hörmət və bərabərhüquqlu tərəfdaşlıq prinsiplərinə əsaslanır. Prezident Mattarella vurğuladı ki, İtaliya Azərbaycanın Avropa İttifaqı ilə əlaqələrinin inkişafını daim dəstəkləyib və bu istiqamətdə əməkdaşlığın daha da genişlənəcəyinə əmindir.

Bəyanatlarda xüsusi olaraq qeyd olundu ki, Azərbaycan və İtaliya münasibətləri yalnız iqtisadi maraqlarla məhdudlaşmır, eyni zamanda sülh, sabitlik, mədəni əməkdaşlıq və qarşılıqlı etimad üzərində qurulub. Bu əlaqələr Avropa ilə Asiya arasında körpü rolunu oynayan Azərbaycanın beynəlxalq nüfuzunu daha da artırır.

Prezident İlham Əliyev çıxışının sonunda vurğuladı ki, qarşıdakı illərdə iki ölkə arasında yeni layihələrin icrası, iqtisadi və texnoloji əməkdaşlığın genişləndirilməsi, eləcə də “yaşıl enerji” və innovativ inkişaf sahələrində birgə fəaliyyət planlaşdırılır.

Bu səfər və mətbuata verilən bəyanatlar göstərdi ki, Azərbaycan və İtaliya münasibətləri etimada, dostluğa və qarşılıqlı maraqlara əsaslanan strateji tərəfdaşlıq modelidir. Bu əməkdaşlıq regionda sülhün və sabitliyin qorunmasına, eləcə də hər iki xalqın rifahının yüksəldilməsinə xidmət edir.

Anar Məmmədov,

YAP Gədəbəy rayon təşkilatının əməkdaşı

Paylaş:

Baxılıb: 403 dəfə