“Bizim İkinci Qarabağ müharibəsindəki Qələbəmiz çox böyük layları yerindən oynadıb”

Bakı:

24 °C

42 %

3 m/s

Əlaqə

AZ RU EN

Ana səhifə / YAP xəbərləri / “Bizim İkinci Qarabağ müharibəsindəki Qələbəmiz çox böyük layları yerindən oynadıb”

“Bizim İkinci Qarabağ müharibəsindəki Qələbəmiz çox böyük layları yerindən oynadıb”

07.01.2026 [17:37]

2020-ci ildə baş vermiş İkinci Qarabağ müharibəsində Azərbaycan Respublikasının qazandığı tarixi Qələbə yalnız işğal altında olan torpaqlarımızın azad edilməsi ilə məhdudlaşmadı. Bu Qələbə regional, geosiyasi, hərbi-strateji və psixoloji baxımdan illərlə formalaşmış bir çox stereotipləri, maraq balanslarını və süni status-kvoları kökündən dəyişdi. Azərbaycanın 44 gün ərzində nümayiş etdirdiyi siyasi iradə, hərbi güc və milli birlik böyük layları yerindən oynatdı və yeni reallıqlar yaratdı.

Uzun illər ərzində Qarabağ münaqişəsi beynəlxalq müstəvidə “dondurulmuş münaqişə” kimi təqdim edilirdi. Bu status-kvo işğalçını cəsarətləndirir, ədalətsizliyi legitimləşdirir və beynəlxalq hüququ kağız üzərində saxlayırdı. Azərbaycan Ordusunun qətiyyətli hücumu bu saxta sabitliyi darmadağın etdi. Məlum oldu ki, siyasi iradə və güclü ordu olduğu təqdirdə illərlə toxunulmaz sayılan reallıqlar bir anda dəyişə bilər.

İkinci Qarabağ müharibəsi müasir müharibə tarixində yeni səhifə açdı. Azərbaycan Ordusu pilotsuz uçuş aparatlarının, yüksək dəqiqlikli silahların, elektron müharibə vasitələrinin və peşəkar kəşfiyyatın uğurlu sintezini nümayiş etdirdi. Bu Qələbə bir çox ölkələrin hərbi doktrinalarına yenidən baxmasına səbəb oldu. Klassik səngər müharibəsinin, uzunmüddətli müdafiə xətlərinin artıq effektiv olmadığını dünya açıq şəkildə gördü.

Bu müharibə Azərbaycan xalqının milli şüurunda dərin iz buraxdı. Xalq–ordu–dövlət birliyi real gücə çevrildi. Cəbhədə döyüşən əsgərdən arxa cəbhədə çalışan vətəndaşa qədər hər kəs eyni amal ətrafında birləşdi. Bu birlik sübut etdi ki, milli ideya üzərində qurulan dövlətlər sarsılmaz olur. Psixoloji baxımdan da bu Qələbə xalqımızın özünə inamını qat-qat artırdı.

Azərbaycanın Qələbəsi Cənubi Qafqazda qüvvələr nisbətini köklü şəkildə dəyişdi. Artıq regionda yeni reallıqları diktə edən, söz sahibi olan güclü Azərbaycan dövləti var. Bu Qələbə yalnız hərbi yox, diplomatik sahədə də Azərbaycanın mövqelərini möhkəmləndirdi. Ermənistan isə uzun illər apardığı işğalçı siyasətin iflasını etiraf etmək məcburiyyətində qaldı.

Azərbaycan beynəlxalq hüququ özü icra etdi. BMT Təhlükəsizlik Şurasının illərlə icrasız qalan qətnamələri Azərbaycan Ordusunun gücü ilə yerinə yetirildi. Bu, dünyaya açıq mesaj oldu: beynəlxalq hüquq yalnız kağız üzərində yox, real güc və siyasi iradə ilə qorunur.

Qələbədən sonra başlanan bərpa və quruculuq işləri göstərdi ki, Azərbaycan yalnız müharibə aparan yox, sülh və inkişaf yaradan dövlətdir. Azad edilmiş ərazilərdə “ağıllı şəhər” və “ağıllı kənd” layihələrinin icrası, infrastrukturun sürətlə bərpası gələcəyə hesablanmış strateji yanaşmanın göstəricisidir.

İkinci Qarabağ müharibəsində qazanılan Qələbə sadəcə hərbi zəfər deyil, tarixi dönüş nöqtəsidir. Bu Qələbə yalan üzərində qurulmuş mifləri dağıtdı, ədalətsiz güc balanslarını sarsıtdı və Azərbaycanı regionun əsas söz sahibinə çevirdi. Doğrudan da, bu Qələbə çox böyük layları yerindən oynatdı və Azərbaycan xalqının tarixində əbədi qürur mənbəyinə çevrildi.

Elnur Qəhrəmanov,

YAP Gədəbəy rayon təşkilatının əməkdaşı

Paylaş:

Baxılıb: 521 dəfə