Dinamik inkişaf edən strateji bağlar

Bakı:

14 °C

82 %

4 m/s

Əlaqə

AZ RU EN

Ana səhifə / YAP xəbərləri / Dinamik inkişaf edən strateji bağlar

Dinamik inkişaf edən strateji bağlar

08.04.2026 [11:37]

Azərbaycan Respublikası ilə Gürcüstan Respublikası arasında münasibətlər çoxəsrlik mehriban qonşuluq ənənələrinə, qarşılıqlı hörmətə və ortaq tarixi-mədəni dəyərlərə əsaslanır. Hər iki dövlətin 1991-ci ildə müstəqilliyini bərpa etməsindən sonra bu əlaqələr keyfiyyətcə yeni mərhələyə qədəm qoymuş, müasir dövrdə isə regionun geosiyasi reallıqlarını müəyyən edən strateji tərəfdaşlıq səviyyəsinə yüksəlmişdir.

İki ölkə arasında diplomatik münasibətlər 18 noyabr 1992-ci ildə qurulmuşdur. Azərbaycan və Gürcüstanın xarici siyasət kursunda qarşılıqlı olaraq suverenliyin, ərazi bütövlüyünün və sərhədlərin toxunulmazlığının tanınması əsas prinsip kimi çıxış edir. Bu yanaşma ikitərəfli münasibətlərin dayanıqlı və etibarlı zəmin üzərində inkişafını təmin edən başlıca amillərdəndir.

Tarixi köklərə söykənən Azərbaycan–Gürcüstan münasibətləri bu gün geniş spektrli əməkdaşlıqla xarakterizə olunur. Azərbaycan Respublikası Gürcüstanla əlaqələrin inkişafına xüsusi önəm verir və qarşılıqlı əməkdaşlığın bütün istiqamətlər üzrə dərinləşdirilməsində maraqlıdır. Ali səviyyədə formalaşmış intensiv siyasi dialoq təhlükəsizlik, müdafiə, iqtisadiyyat, ticarət, enerji, nəqliyyat-logistika, turizm, eləcə də mədəni-humanitar sahələrdə mühüm nailiyyətlərin əldə olunmasına şərait yaratmışdır. Hazırda iki ölkə arasında əməkdaşlıqdan kənarda qalan hər hansı sahə demək olar ki, mövcud deyildir.

Xüsusilə enerji və nəqliyyat-logistika sahələrində həyata keçirilən birgə layihələr ikitərəfli münasibətlərin strateji mahiyyətini daha da gücləndirir. Bakı–Tbilisi–Ceyhan əsas ixrac neft kəməri və Cənub Qaz Dəhlizi kimi transmilli layihələr Avropanın enerji təhlükəsizliyinə mühüm töhfə verir. Eyni zamanda, Bakı–Tbilisi–Qars dəmir yolu xətti Şərq və Qərb arasında səmərəli və etibarlı nəqliyyat bağlantısı yaradaraq regionun tranzit potensialını əhəmiyyətli dərəcədə artırır.

İkitərəfli əlaqələrin inkişafında müxtəlif institusional mexanizmlər də mühüm rol oynayır. Xarici işlər nazirlikləri arasında siyasi məsləhətləşmələr, iqtisadi əməkdaşlıq üzrə birgə hökumətlərarası komissiya, eləcə də parlamentlərarası dostluq qrupları əməkdaşlığın sistemli və ardıcıl şəkildə inkişafına xidmət edir.

Azərbaycan və Gürcüstan beynəlxalq təşkilatlar çərçivəsində də fəal əməkdaşlıq edir. Birləşmiş Millətlər Təşkilatı, ATƏT, GUAM və Qara Dəniz İqtisadi Əməkdaşlıq Təşkilatı kimi platformalarda tərəflər bir-birinin milli maraqlarına həssas yanaşır və qarşılıqlı dəstək nümayiş etdirirlər.

Azərbaycan–Gürcüstan münasibətləri Cənubi Qafqaz regionunda sabitliyin, təhlükəsizliyin və davamlı inkişafın əsas dayaqlarından biri kimi çıxış edir. Dövlət başçılarının qarşılıqlı səfərləri və imzalanmış çoxsaylı sənədlər möhkəm hüquqi baza formalaşdıraraq bu əməkdaşlığın gələcək perspektivlərini daha da genişləndirir. Bu strateji tərəfdaşlıq “Güclü Azərbaycan – Güclü Gürcüstan – Güclü region” prinsipinə əsaslanaraq dinamik şəkildə inkişaf etməkdədir.

Şamo Qasımov

Yeni Azərbaycan Partiyası Laçın rayon təşkilatının sədr müavini

Paylaş:

Baxılıb: 173 dəfə