Azərbaycan–Avropa İttifaqı tərəfdaşlığı yeni mərhələyə yüksəlir

Bakı:

26 °C

69 %

5 m/s

Əlaqə

AZ RU EN

Ana səhifə / YAP xəbərləri / Azərbaycan–Avropa İttifaqı tərəfdaşlığı yeni mərhələyə yüksəlir

Azərbaycan–Avropa İttifaqı tərəfdaşlığı yeni mərhələyə yüksəlir

03.07.2026 [18:46]

2026-cı il iyulun 1-də Azərbaycan Respublikasının Prezidenti İlham Əliyev ölkəmizdə səfərdə olan Avropa Komissiyasının Prezidenti Ursula Fon der Lyayen ilə keçirilən görüşdən sonra mətbuata bəyanatla çıxış edib. Dövlət başçısı bəyanatında Azərbaycan ilə Avropa İttifaqı arasında münasibətlərin strateji əhəmiyyətindən, enerji sahəsində uğurlu əməkdaşlıqdan, yaşıl enerji layihələrinin perspektivlərindən, regional sabitlik və iqtisadi tərəfdaşlıq məsələlərindən geniş bəhs edib.Prezident İlham Əliyev bildirib ki, Azərbaycan ilə Avropa İttifaqı arasında əlaqələr son illər qarşılıqlı etimada və ortaq maraqlara əsaslanaraq davamlı şəkildə inkişaf edir. Onun sözlərinə görə, keçirilən görüşdə ikitərəfli münasibətlərin cari vəziyyəti və gələcək inkişaf perspektivləri geniş müzakirə olunub, əməkdaşlığın müxtəlif istiqamətlərdə daha da dərinləşdirilməsi ilə bağlı fikir mübadiləsi aparılıb.Dövlət başçısı vurğulayıb ki, enerji sahəsi Azərbaycan ilə Avropa İttifaqı arasında tərəfdaşlığın əsas istiqamətlərindən biridir. Qeyd olunub ki, Azərbaycan uzun illərdir Avropanın etibarlı enerji tərəfdaşı kimi fəaliyyət göstərir və təbii qazın təhlükəsiz, fasiləsiz şəkildə Avropa bazarına nəqlini təmin edir. Bu əməkdaşlıq xüsusilə son illərdə Avropanın enerji təhlükəsizliyinin möhkəmləndirilməsində mühüm rol oynayıb və Azərbaycanın beynəlxalq enerji bazarındakı strateji mövqeyini daha da gücləndirib.Prezident İlham Əliyev çıxışında xatırladıb ki, Azərbaycan zəngin enerji resurslarına malik olmaqla yanaşı, bu ehtiyatların dünya bazarına çıxarılması üçün mühüm beynəlxalq layihələrin təşəbbüskarı və iştirakçısıdır. Xəzər dənizinin enerji ehtiyatlarının Avropa bazarına çatdırılması məqsədilə reallaşdırılan layihələr təkcə iqtisadi deyil, həm də geosiyasi baxımdan böyük əhəmiyyət daşıyır.Bəyanatda bərpa olunan enerji sahəsində əməkdaşlıq məsələlərinə də xüsusi yer ayrılıb. Dövlət başçısı bildirib ki, Azərbaycan yaşıl enerji keçidini dövlət siyasətinin əsas istiqamətlərindən biri kimi müəyyənləşdirib. Xəzər dənizinin külək enerjisi potensialı, günəş enerjisi layihələri və digər alternativ enerji mənbələrinin inkişafı istiqamətində həyata keçirilən tədbirlər Avropa İttifaqı ilə bu sahədə əməkdaşlığın genişləndirilməsi üçün yeni imkanlar yaradır. Yaşıl enerjinin gələcəkdə həm daxili tələbatın ödənilməsində, həm də ixrac imkanlarının artırılmasında mühüm rol oynayacağı qeyd edilib.Prezident İlham Əliyev görüş zamanı nəqliyyat-kommunikasiya layihələri, regional bağlantıların gücləndirilməsi, iqtisadi və investisiya əməkdaşlığı, ticarət dövriyyəsinin artırılması kimi məsələlərin də müzakirə edildiyini diqqətə çatdırıb. Bildirilib ki, Azərbaycanın iştirak etdiyi beynəlxalq nəqliyyat dəhlizləri Avropa ilə Asiya arasında etibarlı yükdaşımaların təmin olunmasına mühüm töhfə verir və ölkəmizin tranzit imkanları ildən-ilə genişlənir.Dövlət başçısı regionda davamlı sülhün və təhlükəsizliyin təmin edilməsinin Azərbaycanın əsas prioritetlərindən biri olduğunu vurğulayaraq qeyd edib ki, ölkəmiz Cənubi Qafqazda uzunmüddətli sabitliyin bərqərar olması üçün ardıcıl siyasət həyata keçirir. Bu istiqamətdə beynəlxalq tərəfdaşlarla dialoqun və əməkdaşlığın genişləndirilməsi xüsusi əhəmiyyət daşıyır.Prezident İlham Əliyev bəyanatının sonunda Azərbaycan ilə Avropa İttifaqı arasında münasibətlərin gələcəkdə də yüksələn xətlə inkişaf edəcəyinə əminliyini ifadə edib. O bildirib ki, Ursula Fon der Lyayenin Azərbaycana səfəri qarşılıqlı etimada əsaslanan tərəfdaşlığın daha da möhkəmlənməsinə, enerji, iqtisadiyyat, nəqliyyat və digər sahələrdə əməkdaşlığın yeni mərhələyə yüksəlməsinə mühüm töhfə verəcək.

Lalə İskəndərova

YAP Qusar rayon təşkilatının məsləhətçisi

Paylaş:

Baxılıb: 293 dəfə