Azərbaycan–Avropa İttifaqı əlaqələri yeni inkişaf mərhələsində

Bakı:

26 °C

69 %

5 m/s

Əlaqə

AZ RU EN

Ana səhifə / YAP xəbərləri / Azərbaycan–Avropa İttifaqı əlaqələri yeni inkişaf mərhələsində

Azərbaycan–Avropa İttifaqı əlaqələri yeni inkişaf mərhələsində

07.07.2026 [11:44]

Azərbaycan ilə Avropa İttifaqı arasında münasibətlər son illərdə enerji təhlükəsizliyi, iqtisadi əməkdaşlıq, nəqliyyat-kommunikasiya layihələri və regional sabitlik istiqamətlərində ardıcıl inkişaf edir. Qarşılıqlı maraqlara əsaslanan bu əməkdaşlıq Avropanın enerji təhlükəsizliyinin möhkəmləndirilməsində, Azərbaycanın isə beynəlxalq iqtisadi və siyasi tərəfdaşlıqlarının genişlənməsində mühüm rol oynayır.

Bu əməkdaşlığın növbəti mühüm mərhələsi Avropa Komissiyasının Prezidenti Ursula fon der Lyayenin iyulun 1-də Azərbaycana həyata keçirdiyi işgüzar səfər oldu. Səfər çərçivəsində Prezident İlham Əliyevlə keçirilən görüşlərdə Azərbaycan–Avropa İttifaqı münasibətlərinin hazırkı vəziyyəti, gələcək əməkdaşlıq perspektivləri, enerji təhlükəsizliyi, yaşıl enerji, nəqliyyat dəhlizləri və Cənubi Qafqazda davamlı sülhün təmin olunması məsələləri geniş müzakirə edildi.

Görüş zamanı Avropa Komissiyasının Prezidenti Azərbaycanın Avropa üçün etibarlı enerji tərəfdaşı olduğunu vurğulayaraq, Cənub Qaz Dəhlizinin Avropanın enerji təhlükəsizliyinin təmin edilməsində mühüm əhəmiyyət daşıdığını qeyd etdi. Eyni zamanda, bərpa olunan enerji, xüsusilə Xəzər dənizində külək enerjisi potensialı və yaşıl enerji dəhlizlərinin yaradılması istiqamətində əməkdaşlığın genişləndirilməsinin vacibliyi diqqətə çatdırıldı.

Səfərin əsas nəticələrindən biri də Avropa İttifaqının Cənubi Qafqazda nəqliyyat, enerji və rəqəmsal infrastrukturun inkişafına dəstək məqsədilə 200 milyon avroya qədər qrant ayırmaq niyyətini açıqlaması oldu. Bu təşəbbüs daha geniş həcmdə dövlət və özəl investisiyaların cəlb edilməsinə şərait yaradaraq regionun Avropa ilə əlaqələrinin möhkəmləndirilməsinə xidmət edəcək. Bundan əlavə, sərhədyanı ərazilərdə sosial inkişaf, minatəmizləmə, səhiyyə və yerli sahibkarlığın dəstəklənməsi üçün əlavə maliyyə proqramının həyata keçirilməsi də nəzərdə tutulur.

Azərbaycanın əlverişli coğrafi mövqeyi, Orta Dəhlizin inkişafında oynadığı rol və Avropa ilə Mərkəzi Asiyanı birləşdirən mühüm nəqliyyat qovşağı kimi əhəmiyyəti bu əməkdaşlığın strateji dəyərini daha da artırır. Avropa İttifaqı Azərbaycanın regional sabitlik və iqtisadi inteqrasiya proseslərində mühüm tərəfdaş olduğunu vurğulayır.

Bütün bunlar göstərir ki, Azərbaycan–Avropa İttifaqı münasibətləri qarşılıqlı etimad və ortaq maraqlar əsasında inkişaf edir. Enerji təhlükəsizliyi, yaşıl iqtisadiyyat, nəqliyyat-kommunikasiya layihələri və regional əməkdaşlıq gələcək dövrdə də tərəflər arasında əlaqələrin əsas istiqamətlərini təşkil edəcək. Ursula fon der Lyayenin Azərbaycana işgüzar səfəri isə bu münasibətlərin daha da möhkəmlənməsinə və yeni əməkdaşlıq imkanlarının yaranmasına mühüm töhfə verən əlamətdar hadisə kimi qiymətləndirilə bilər.

Araz Xudadanov

YAP Sabunçu rayon təşkilatının sədri

Paylaş:

Baxılıb: 439 dəfə