Azərbaycan–Slovakiya münasibətlərində yeni mərhələ: Şuşadan dünyaya verilən strateji tərəfdaşlıq mesajı

Bakı:

26 °C

65 %

4 m/s

AZ RU EN

Ana səhifə / YAP xəbərləri / Azərbaycan–Slovakiya münasibətlərində yeni mərhələ: Şuşadan dünyaya verilən strateji tərəfdaşlıq mesajı

Azərbaycan–Slovakiya münasibətlərində yeni mərhələ: Şuşadan dünyaya verilən strateji tərəfdaşlıq mesajı

16.07.2026 [10:43]

Prezident İlham Əliyevin Slovakiya Respublikasının Prezidenti Peter Pelleqrinin Azərbaycana rəsmi səfəri çərçivəsində iyulun 14-də Şuşada verdiyi bəyanat Azərbaycan–Slovakiya münasibətlərinin yüksək inkişaf səviyyəsini və gələcək perspektivlərini aydın şəkildə ortaya qoydu. Dövlət başçısının vurğuladığı kimi, son illərdə iki ölkə arasında siyasi dialoq intensiv xarakter alıb, qarşılıqlı səfərlər müntəzəm hal alıb və əməkdaşlığın coğrafiyası əhəmiyyətli dərəcədə genişlənib. Keçən ilin sonunda Prezident İlham Əliyevin Slovakiyaya rəsmi səfəri, bu ilin iyulunda isə Prezident Peter Pelleqrinin Azərbaycana səfəri münasibətlərin davamlı inkişaf etdiyini təsdiqləyən mühüm hadisələrdir. Bu səfərlər yalnız diplomatik protokol xarakteri daşımır, eyni zamanda konkret nəticələrə hesablanmış siyasi iradənin və qarşılıqlı etimadın ifadəsidir.

Şuşada keçirilən görüşün xüsusi əhəmiyyəti ondan ibarətdir ki, bu şəhər artıq Azərbaycanın beynəlxalq əməkdaşlıq platformalarından birinə çevrilib. İşğaldan azad olunmuş torpaqlarda xarici dövlət başçılarının qəbul edilməsi, beynəlxalq tədbirlərin təşkili və strateji görüşlərin keçirilməsi Azərbaycanın bölgədə yaratdığı yeni reallıqların dünya tərəfindən qəbul olunduğunu nümayiş etdirir. Prezident Peter Pelleqrinin Şuşaya səfəri və burada aparılan danışıqlar həm də Slovakiyanın Azərbaycanın suverenliyinə, ərazi bütövlüyünə və postmünaqişə dövründə həyata keçirdiyi bərpa siyasətinə verdiyi dəstəyin mühüm göstəricisidir.

Prezident İlham Əliyev bəyanatında qeyd etdi ki, iki ölkənin gündəliyi kifayət qədər genişdir və əməkdaşlıq yalnız siyasi əlaqələrlə məhdudlaşmır. İqtisadiyyat, energetika, sənaye, investisiya, nəqliyyat, hərbi-texniki əməkdaşlıq, kənd təsərrüfatı, rəqəmsal texnologiyalar, humanitar və təhsil sahələrində də geniş əməkdaşlıq imkanları mövcuddur. Görüşdə iştirak edən nümayəndə heyətlərinin geniş tərkibi də bunun bariz sübutu idi. Bu, tərəflərin münasibətləri daha da dərinləşdirmək və konkret layihələr həyata keçirmək niyyətində olduqlarını göstərir. Azərbaycan ilə Slovakiya arasında əməkdaşlığın praktiki nəticələrə əsaslanması münasibətlərin dayanıqlı inkişafını təmin edən əsas amillərdən biridir.

Dövlət başçısının xüsusi vurğuladığı məsələlərdən biri də 2024-cü ildə imzalanmış Strateji Tərəfdaşlığa dair Birgə Bəyannamə oldu. Həmin sənəd iki ölkə arasında münasibətləri keyfiyyətcə yeni mərhələyə yüksəldib. Bu gün həmin sənəd çərçivəsində nəzərdə tutulan müddəaların uğurla icra olunması, yeni layihələrin reallaşdırılması və müxtəlif istiqamətlər üzrə əməkdaşlığın genişlənməsi strateji tərəfdaşlığın real nəticələr verdiyini göstərir. Güclü siyasi iradə və qarşılıqlı etimad bu münasibətlərin əsas dayağıdır və gələcəkdə daha böyük layihələrin həyata keçirilməsinə zəmin yaradır.

Şuşada səsləndirilən fikirlər arasında Slovakiyanın Qarabağın bərpasında iştirakı xüsusi yer tutdu. Prezident İlham Əliyev Slovakiya şirkətlərinin işğaldan azad olunmuş ərazilərdə həyata keçirdiyi layihələri yüksək qiymətləndirdi və bu dəstəyə görə Slovakiya rəhbərliyinə təşəkkürünü bildirdi. Ağdam rayonunun Baş Qərvənd kəndində Slovakiya şirkəti tərəfindən həyata keçirilən “Ağıllı kənd” layihəsi müasir texnologiyaların tətbiqi, dayanıqlı inkişaf prinsiplərinin reallaşdırılması və insanların yüksək yaşayış şəraitinin təmin olunması baxımından mühüm əhəmiyyət daşıyır. Bu layihə yalnız infrastrukturun bərpasına deyil, həm də Qarabağın sosial-iqtisadi inkişafına və müasir yaşayış məkanına çevrilməsinə xidmət edir.

Azərbaycan bu gün işğaldan azad olunmuş ərazilərdə genişmiqyaslı bərpa və quruculuq proqramını uğurla həyata keçirir. Yeni yollar, hava limanları, yaşayış məntəqələri, məktəblər, xəstəxanalar, enerji və kommunikasiya infrastrukturu qurulur. Bu prosesdə dost və tərəfdaş ölkələrin, o cümlədən Slovakiyanın iştirakı beynəlxalq əməkdaşlığın uğurlu nümunəsidir. Slovakiyanın Qarabağın bərpasına verdiyi töhfə iki ölkə arasında dostluğun və strateji tərəfdaşlığın praktik nəticəsi kimi qiymətləndirilir.

Görüş zamanı energetika sahəsində əməkdaşlıq da əsas müzakirə mövzularından biri oldu. Azərbaycan Avropanın enerji təhlükəsizliyinin təmin edilməsində mühüm rol oynayan etibarlı tərəfdaş kimi çıxış edir. Təbii qaz ixracının artırılması, yaşıl enerji layihələrinin həyata keçirilməsi və alternativ enerji sahəsində əməkdaşlıq Slovakiya üçün də böyük əhəmiyyət daşıyır. Bununla yanaşı, nəqliyyat və logistika sahəsində əməkdaşlığın genişləndirilməsi, Orta Dəhlizin imkanlarından istifadə və qarşılıqlı investisiyaların artırılması gələcək inkişaf üçün mühüm istiqamətlər hesab olunur.

Prezident İlham Əliyev bəyanatında Prezident Peter Pelleqrinin Azərbaycana ilk dəfə səfər etmədiyini də xüsusi qeyd etdi. Onun əvvəlki vəzifələrdə – parlament sədri və Baş nazir kimi Azərbaycana səfərləri, daha sonra COP29 tədbirlərində iştirakı və indi Prezident kimi rəsmi səfəri Slovakiyanın Azərbaycanla münasibətlərə daim böyük önəm verdiyini göstərir. Bu ardıcıllıq iki ölkə arasında formalaşmış qarşılıqlı etimadın və dostluğun mühüm göstəricisidir.

Şuşada keçirilən bu görüş bir daha nümayiş etdirdi ki, Azərbaycan və Slovakiya arasında münasibətlər təsadüfi deyil, uzunmüddətli strateji maraqlara əsaslanır. Qarşılıqlı hörmət, bərabərhüquqlu əməkdaşlıq, beynəlxalq hüquqa sadiqlik və konkret nəticələrə hesablanmış siyasət bu tərəfdaşlığın əsas prinsipləridir. Hər iki ölkə regional sabitliyin, iqtisadi inkişafın və beynəlxalq əməkdaşlığın möhkəmləndirilməsi istiqamətində ortaq mövqedən çıxış edir.

Prezident İlham Əliyevin Şuşadan verdiyi mesaj aydın və qəti idi: Azərbaycan ilə Slovakiya arasında yaranmış strateji tərəfdaşlıq bundan sonra da uğurla inkişaf edəcək. Siyasi iradə, qarşılıqlı etimad, həyata keçirilən birgə layihələr və ortaq maraqlar bu münasibətlərin daha da möhkəmlənməsinə xidmət edəcək. Şuşada keçirilən bu görüş isə Azərbaycan–Slovakiya əməkdaşlığının tarixində yeni bir səhifə olmaqla yanaşı, postmünaqişə dövründə Azərbaycanın beynəlxalq mövqeyinin daha da gücləndiyini göstərən mühüm siyasi hadisə kimi yadda qalacaq.

Rövşən Qasımov,

YAP Gədəbəy rayon təşkilatının məsləhətçisi

Paylaş:

Baxılıb: 299 dəfə