Bakı və Bratislava arasında strateji əməkdaşlığın yeni üfüqləri

Bakı:

26 °C

69 %

4 m/s

Əlaqə

AZ RU EN

Ana səhifə / YAP xəbərləri / Bakı və Bratislava arasında strateji əməkdaşlığın yeni üfüqləri

Bakı və Bratislava arasında strateji əməkdaşlığın yeni üfüqləri

17.07.2026 [13:09]

İyulun 14-də Slovakiya Respublikasının Prezidenti Peter Pelleqrininin Azərbaycana rəsmi səfəri çərçivəsində Şuşada baş tutan görüş və ardınca verilən bəyanatlar iki ölkə arasındakı münasibətlərdə yeni bir tarixi mərhələnin başlanğıcı oldu.

Prezident İlham Əliyevin Şuşadan səsləndirdiyi bəyanatlar təkcə ikitərəfli əlaqələrin gələcək inkişaf perspektivlərini deyil, həm də regional təhlükəsizlik, enerji tərəfdaşlığı və qlobal əməkdaşlıq kontekstində mühüm mesajları özündə ehtiva edirdi. Bu görüş Şuşanın artıq təkcə mədəniyyət deyil, həm də regional və beynəlxalq siyasətin mühüm qərarlarının qəbul olunduğu strateji bir mərkəzə çevrildiyini bir daha sübut etdi.

görüş təkcə rəmzi xarakter daşımırdı, həm də iki ölkə arasında real addımlarla möhkəmlənən strateji tərəfdaşlığın əyani sübutu idi. Prezident İlham Əliyev və Slovakiya Prezidenti Peter Pelleqrininin birgə mətbuat bəyanatlarında toxunulan məsələlər əməkdaşlığın çoxşaxəli və praktiki xarakterini tam dolğunluğu ilə ortaya qoydu.

Bu görüşün və bəyanatların ən çox diqqət çəkən və qlobal əhəmiyyət kəsb edən məqamlarından biri heç şübhəsiz ki, enerji tərəfdaşlığı oldu. Azərbaycanın Avropanın enerji təhlükəsizliyində oynadığı etibarlı tərəfdaş rolu bu Şuşa bəyanatları ilə bir daha təsdiqini tapdı. Xüsusilə, Azərbaycan qazının Slovakiyaya və onun vasitəsilə digər Avropa ölkələrinə nəql edilməsi imkanları ətraflı müzakirə olundu. Bu addım Avropanın enerji şaxələndirilməsi siyasətinə mühüm töhfə kimi qiymətləndirilməklə yanaşı, iki ölkə arasındakı iqtisadi bağları daha da sarsılmaz edir. Bununla yanaşı, tərəflər bərpaolunan və yaşıl enerji sahəsində də gələcək birgə layihələrin perspektivlərinə toxundular. Azərbaycanın Qarabağ və Şərqi Zəngəzuru rəsmi olaraq "yaşıl enerji zonası" elan etməsi fonunda, bu ərazilərdə Slovakiya şirkətlərinin iştirak imkanları xüsusi önəm daşıyır.

Şuşadan verilən bəyanatlarda ən mühüm və humanitar-sosial xarakter daşıyan əməkdaşlıq nümunəsi kimi Ağdamın Baş Qərvənd kəndinin yenidən qurulması layihəsi önə çıxdı. Slovakiya şirkətlərinin birbaşa və fəal iştirakı ilə reallaşdırılacaq bu layihə çərçivəsində Baş Qərvənd kəndi müasir standartlara uyğun şəkildə – "Ağıllı kənd" (Smart Village) konsepsiyası əsasında tamamilə yenidən inşa ediləcəkdir. Prezident İlham Əliyev öz bəyanatında bu dostyana addımı xüsusilə vurğulayaraq, bunu ölkələrimiz arasındakı səmimi dostluq və həmrəylik nümunəsi kimi dəyərləndirdi. Bu layihə təkcə bir infrastruktur quruculuğu deyil, həm də postmünaqişə dövründə Qarabağın bərpa prosesində Avropa ölkələrinin Azərbaycanın yanında olmasının və onun haqlı mübarizəsinə verdiyi praktiki dəstəyin rəmzidir.

Digər tərəfdən, dövlət başçılarının bəyanatlarında müdafiə sənayesi, hərbi-texniki əməkdaşlıq və qarşılıqlı investisiyaların təşviqi kimi strateji sahələr də geniş yer aldı. İki ölkə arasında birgə istehsal sahələrinin yaradılması, ticarət dövriyyəsinin artırılması və xüsusilə "Orta Dəhliz" çərçivəsində nəqliyyat-logistika imkanlarının inkişaf etdirilməsi qarşıdakı dövrün əsas hədəfləri kimi müəyyənləşdirildi. Bu addımlar göstərir ki, Bakı və Bratislava arasında formalaşan tərəfdaşlıq regional çərçivəni aşaraq, daha geniş geosiyasi və geoiqtisadi coğrafiyada sabitliyə və inkişafa xidmət edir.

Slovakiya Prezidenti Peter Pelleqrininin Azərbaycana rəsmi səfəri və Şuşada keçirilən görüş, ölkələrimiz arasında qurulan strateji tərəfdaşlığın ən yüksək səviyyəyə çatdığının göstəricisidir. Prezident İlham Əliyevin Şuşada səsləndirdiyi bəyanatlar təkcə iqtisadi və enerji əməkdaşlığı ilə məhdudlaşmır, həm də Qarabağın yenidən qurulmasında Avropa tərəfdaşlarımızın fəal iştirakını təmin edərək Azərbaycanın regionda yaratdığı yeni reallıqları beynəlxalq səviyyədə bir daha təsdiqləyir. Şuşadan dünyaya göndərilən bu əməkdaşlıq və sülh mesajları, gələcək birgə layihələrin uğurla reallaşacağına, eləcə də Azərbaycan-Slovakiya dostluğunun daha da dərinləşəcəyinə möhkəm zəmin yaradır.

Türkanə Kərimova

YAP Babək rayon təşkilatının əməkdaşı

Paylaş:

Baxılıb: 259 dəfə