YAP Azərbaycanın müstəqilliyinin qorunması və möhkəmlənməsində mühüm rol oynayıb

Bakı:

22 °C

46 %

4 m/s

Əlaqə

AZ RU EN

Ana səhifə / YAP xəbərləri / YAP Azərbaycanın müstəqilliyinin qorunması və möhkəmlənməsində mühüm rol oynayıb

YAP Azərbaycanın müstəqilliyinin qorunması və möhkəmlənməsində mühüm rol oynayıb

18.11.2014 [09:46]

Partiyanın yaradılmasının 22-ci ildönümü münasibətilə YAP Nizami rayon təşkilatında tədbir keçirilib
Yeni Azərbaycan Partiyasının (YAP) yaradılmasının 22-ci ildönümü münasibətilə YAP Gənclər Birliyinin təşkilatçılığı ilə partiyanın Nizami rayon təşkilatında tədbir keçirilib. Əvvəlcə YAP-ın keçdiyi şərəfli inkişaf yolundan, Ulu öndər Heydər Əliyevin Azərbaycan xalqı qarşısındakı xidmətlərindən və Prezident İlham Əliyevin uğurlu daxili və xarici siyasətinin nəticələrindən bəhs edən film nümayiş olunub.
Çıxış edən YAP Nizami rayon təşkilatının sədri, millət vəkili Sədaqət Vəliyeva bildirib ki, Azərbaycanın son illərdə qazandığı böyük nailiyyətlər Ulu öndər Heydər Əliyevin yaratdığı və bu gün Prezident İlham Əliyevin Sədri olduğu Yeni Azərbaycan Partiyasının fəaliyyəti ilə bilavasitə bağlıdır. Onun sözlərinə görə, tarixi zərurətdən yaranan partiya müstəqilliyimizin qorunması, dövlətçiliyimizin möhkəmləndirilməsi, iqtisadiyyatımızın inkişaf etdirilməsi, həmçinin, demokratiyanın yaranması və inkişafında mühüm rol oynayıb.
S.Vəliyeva qeyd edib ki, 1993-cü ildə yaradılmış YAP Nizami rayon təşkilatı mühüm inkişaf yolu keçib, üzvlərinin və ərazi təşkilatlarının sayı əhəmiyyətli dərəcədə artıb: “Nizami rayonunda əhalinin YAP-a axını, ilk ərazi partiya təşkilatlarının yaradılması Ulu öndər Heydər Əliyevin əsasını qoyduğu siyasi kursa və Onun layiqli davamçısı, Prezident İlham Əliyevə inamdan irəli gəlir. Elə bunun nəticəsidir ki, bu gün YAP Nizami rayon təşkilatı 150-yə yaxın ərazi ilk partiya təşkilatlarında 11 min nəfərdən çox üzvü birləşdirir”.
YAP İdarə Heyətinin üzvü, Milli Məclisin Aqrar siyasət komitəsinin sədri Eldar İbrahimov partiyanın şərəfli mübarizə tarixindən, Ümummilli lider Heydər Əliyevin doğma xalqı qarşısında misilsiz xidmətlərindən danışıb. Vurğulanıb ki, bu gün Prezident İlham Əliyevin Sədri olduğu YAP-ın nüfuzu getdikcə artmaqdadır. Partiyanın cəmiyyətin inkişafına yönəlmiş çoxsaylı sosial layihələr reallaşdırması, gəncləri dövlətçilik və milli maraqlar ətrafında sıx birləşdirməsi onun tərəfdarlarının sayının artmasına səbəb olub. “Ümummilli lider Heydər Əliyevin əsasını qoyduğu inkişaf strategiyasının Prezident İlham Əliyev tərəfindən uğurla davam etdirilməsi nəticəsində Azərbaycan Cənubi Qafqazın lider dövlətinə çevrilib”, - deyən E.İbrahimov qeyd edib ki, bu gün ölkədə ən kütləvi və mütəşəkkil siyasi qüvvə olan YAP sıralarında 630 mindən artıq üzvü birləşdirir. Bu, təkcə statistika deyil, eyni zamanda, ölkə vətəndaşlarının Azərbaycan reallığına verdiyi qiymət və Prezident İlham Əliyevin həyata keçirdiyi uğurlu daxili və xarici siyasətə inamın ifadəsidir.
Nizami rayon İcra Hakimiyyətinin başçısı, YAP Siyasi Şurasının üzvü Tahir Budaqov ölkəmizin son dərəcə çətin sınaqlar qarşısında qaldığı bir vaxtda yaranan partiyanın xidmətlərindən bəhs edib. T.Budaqov YAP iqtidara gəldikdən sonra Azərbaycan iqtisadiyyatının sürətlə inkişaf etdiyini, bütün sahələrdə əhəmiyyətli dəyişikliklər baş verdiyini, ölkəmizin hər bir vətəndaşının həyatında, yaşayış səviyyəsində ciddi irəliləyişlər əldə olunduğunu diqqətə çatdırıb. Qeyd edib ki, Azərbaycanın uğurları yalnız bölgənin güclü dövlətinə çevrilməsi ilə məhdudlaşmır, onun beynəlxalq aləmdə yeri və nüfuzu getdikcə artır.
YAP Gənclər Birliyinin sədri, partiyanın Siyasi Şurasının üzvü Seymur Orucov deyib ki, partiya Azərbaycan tarixinin keşməkeşli günlərində, xalqımızın ağır sınaqlara məruz qaldığı bir dövrdə yaradılıb: “Dünənin, bu günün və gələcəyin partiyası olan YAP ötən 22 ildə Azərbaycanı bir çox bəlalardan xilas edib, dövlətçiliyimizin qorunması və möhkəmləndirilməsində mühüm rol oynayıb”.
“Səs” Media Holdinqin rəhbəri Bəhruz Quliyev çıxış edərək partiyanın Azərbaycanın dövlət müstəqilliyinin qorunub saxlanmasında, ölkəmizin regionun liderinə çevrilməsində özünəməxsus rolundan danışıb. Qeyd edib ki, YAP keçən əsrin 80-ci illərinin sonu, 90-cı illərinin əvvəllərində ölkəmizdə meydana çıxan mürəkkəb siyasi vəziyyətdə zamanın tələbi və Azərbaycan xalqının arzu və istəklərinin ifadəsi kimi yaranıb.
Daha sonra YAP Siyasi Şurasının üzvü, partiyanın Gənclər Birliyinin sədr müavini Samirə Quliyeva, YAP Nizami rayon təşkilatının Gənclər Birliyinin sədri, Gənclər Birliyi Ofisinin rəhbəri Əli Pənahov və digərləri çıxış edərək Yeni Azərbaycan Partiyasının Sədri, Prezident İlham Əliyevin gənclərə göstərdiyi diqqət və qayğıdan bəhs ediblər. Bildirilib ki, YAP yeganə milli siyasi qüvvədir ki, burada gənclərin fəaliyyəti və inkişafı üçün hərtərəfli şərait vardır.
Tədbirin sonunda gənc partiya fəalları tərəfindən dahi şəxsiyyət Heydər Əliyev haqqında şeirlər səsləndirilib.
N.BAYRAMLI

Paylaş:

Baxılıb: 884 dəfə