Bank islahatları iqtisadi islahatların ayrılmaz hissəsidir

Bakı:

25 °C

67 %

8 m/s

Əlaqə

AZ RU EN

Ana səhifə / İqtisadiyyat / Bank islahatları iqtisadi islahatların ayrılmaz hissəsidir

Bank islahatları iqtisadi islahatların ayrılmaz hissəsidir

26.07.2016 [16:29]

Ölkə iqtisadiyyatının neftdən asılılığının minimuma endirilməsi və onun real sektora transformasiya edilməsi məqsədilə həyata keçirilən sürətli iqtisadi islahatlar öz növbəsində bank sektorunun da yenidən qurulmasını zəruri edir. Yeni iqtisadi mühitdə banklar bazarı daha yaxından hiss edən, onun tələblərini hər kəsdən tez müəyyən etməyi bacaran analitik bir mərkəz kimi fəaliyyət göstərməlidir. Məhz bu prinsipləri öz fəaliyyətinin əsasına qoyan bank sistemi olan ölkələrdə iqtisadiyyatın sürətli inkişafına nail olunub. Bütün hallar üçün iqtisadiyyatın yüksəlişi, məhz bank sektoru tərəfindən fasiləsiz pul və kapital dövriyyəsinin təmin edilməsindən, iqtisadiyyatın ayrı-ayrı sahələrinin, dövlətin və əhalinin kreditləşməsinin yüksək səviyyədə təşkil edilməsindən asılıdır. Real olan budur ki, banklar əhalinin və müəssisələrin sərbəst vəsaitlərini, habelə digər sərfəli mənbəələrdən vəsaitləri cəlb edib, onları müxtəlif sahələr arasında yenidən bölüşdürərək, bütövlükdə inkişafın lokomotivi rolunu öz üzərlərinə götürməlidirlər.
Bankların iqtisadiyyatın inkişafında mühüm rolunu nəzərə alan Prezident İlham Əliyev iqtisadiyyatın real sektorunda aparılan sürətli islahatlarla eyni vaxtda bank islahatlarına da xüsusi diqqət ayırır. Bankların müasir tələblərə cavab verə biləcək səviyyədə yenidən qurulması məqsədilə ölkədə bank islahatlarına start verilib. Bu ilin fevral ayının əvvəllərində Maliyyə Bazarlarına Nəzarət Palatası yaradılıb və banklarda olan bütün əmanətlər üç il müddətinə tam sığortalanıb. Bu günlərdə isə ölkə başçısının imzaladığı Fərmanla Maliyyə Stabilliyi Şurası yaradılıb. Prezident bu qərarı dünyanı bürümüş iqtisadi və maliyyə böhranı şəraitində ölkədə maliyyə sabitliyinin tam bərqərar olması və bank sektorunda islahatların səmərəli aparılması məqsədilə qəbul edib. Baş nazirin rəhbərliyi altında fəaliyyət göstərəcək bu Şuraya ölkənin əsas iqtisadi və maliyyə qurumlarının rəhbərləri daxildir. Şuranın əsas məqsədi, ölkədə maliyyə sabitliyi yaratmaq yolunda bütün aidiyyatı qurumların fəaliyyətini tam koordinasiya etməkdən ibarətdir. Deməli, bundan sonra ölkənin maliyyə sabitliyinin təmin olunmasına yönəlmiş addımlar ayrıca götürülmüş bir qurumun deyil, bütöv bir peşəkar komandanın razılaşdırılmış qərarı əsasında atılacaq. Prezident bu qərarla aparılan bütün islahatların Özünün şəxsi nəzarəti altında olduğunu bir daha göstərdi.
Bank sisteminin yenidən qurulması aparılan iqtisadi islahatların səmərəliliyini təmin etməyə hesablanıb. Əslində, bütün başqa islahatlar kimi bank islahatları da ağrısız olmur. Lakin bu gün biz başqa bir seçim edə bilmərik. Bankların bağlanması ilə bağlı ortaya çıxacaq bütün çətinlikləri dəf etməyi bacarmalıyıq. İslahatlar nəticə etibarilə bankların üzünü əsaslı şəkildə ölkənin iqtisadiyyatına çevirməyi nəzərdə tutur. Banklar kredit verərkən, ilk növbədə bütün səylərini təqdim olunmuş layihənin reallığını yüksək peşəkarlıqla araşdırmağa sərf etməlidirlər. Bunun üçün də yüksək peşə hazırlığı kursları təşkil edilməli, aparıcı xarici banklarla müqavilələr bağlanmalı və təcrübə keçmək üçün mütəxəssislər həmin banklara ezam edilməlidirlər. Bir sözlə, "kredit üçün dəyəri kreditin məbləğindən bir neçə dəfə çox olan girov yetərlidi" psixologiyasını sındırmağın zamanı artıq çatıb. Çünkü hökumətin bank islahatlarından gözləntiləri tamamilə başqadır.
Fikrət Yusifov
Iqtisad elmləri doktoru, professor

Paylaş:

Baxılıb: 1071 dəfə