Azərbaycan-Rusiya əlaqələri yeni üfüqlər fəth edir

Bakı:

17 °C

88 %

3 m/s

Əlaqə

AZ RU EN

Ana səhifə / Siyasət / Azərbaycan-Rusiya əlaqələri yeni üfüqlər fəth edir

Azərbaycan-Rusiya əlaqələri yeni üfüqlər fəth edir

10.06.2014 [09:07]

Qriqori Karasin: İki ölkə münasibətlərindəki müsbət inkişaf qarşılıqlı hörmət və dostluq prinsipi əsasında qurulan möhkəm strateji əməkdaşlığın gücünü göstərir
Ümummilli lider Heydər Əliyevin əsasını qoyduğu və dövlət başçısı İlham Əliyevin ardıcıllıqla davam etdirdiyi məqsədyönlü balanslaşdırılmış xarici siyasət kursu sayəsində müstəqil Azərbaycanın beynəlxalq nüfuzu əhəmiyyətli dərəcədə artıb. Təkcə belə bir faktı vurğulamaq kifayətdir ki, cəmi 23 illik müstəqillik tarixinə malik Azərbaycan dünyanın ən nüfuzlu qurumu sayılan BMT-nin Təhlükəsizlik Şurasında təmsil olunub. Artıq respublikamız özünü beynəlxalq birliyin suveren aktoru kimi təsdiqləməklə yanaşı, həm də bu birliyə layiqli töhfələr verən etibarlı tərəfdaş kimi tanınır. Azərbaycanın beynəlxalq terrorizmə qarşı mübarizə və sülhyaratma missiyalarında fəal iştirak etməsi buna misaldır. Eyni zamanda paytaxt Bakı müxtəlif beynəlxalq tədbirlərin-humanitar forumların, qlobal məsələlərin müzakirə edildiyi konfransların keçirildiyi mərkəzə çevrilib. Ölkəmizin beynəlxalq təşkilatlarla və dünya dövlətləri ilə əlaqələri ildən-ilə genişlənir və daha da möhkəmlənir.
Milli, regional və qlobal maraqların məharətlə uzlaşdırılması Azərbaycanın effektiv xarici siyasət strategiyasının qısa müddətdə böyük uğurlar qazanmasını şərtləndirən əsas amildir. Xarici siyasət kursunda beynəlxalq norma və prinsiplərdən çıxış edən respublikamız başqa dövlətlərin seçimlərinə hörmətlə yanaşmaq və onların daxili işlərinə qarışmamaq xətti yürüdür. Azərbaycanın seçdiyi bu yol beynəlxalq arenada hörmətlə qarşılanır və təqdir olunur. Öz növbəsində ayrı-ayrı dövlətlərin rəsmiləri, beynəlxalq miqyasda tanınan siyasətçilər və diplomatlar ölkəmizin xarici siyasət kursunun üstünlüklərini etiraf edirlər.
Bu sırada Rusiyanın xarici işlər nazirinin müavini Qriqori Karasinin fikirləri xüsusi maraq doğurur. “Rusiya Bakının xarici siyasət kursuna böyük hörmətlə yanaşır. Bu kursun əsası Heydər Əliyev tərəfindən qoyulmuşdur. Müasir Azərbaycanın xarici siyasətini səciyyələndirən amillər - müstəqillik, tarazlıq və milli maraqların dəqiq formalaşdırılması və ardıcıl qorunmasıdır.
Bütün bunlar ona zəmanət verir ki, Azərbaycan özgə geosiyasi layihənin girovuna çevrilməyəcək”. Qonşu dövlətin yüksək səviyyəli rəsmisi mətbuata açıqlamasında, həmçinin, Azərbaycanın xarici siyasət strategiyasının perspektivləri barədə də nikbin danışıb: “Şübhə etmirik ki, Azərbaycanın beynəlxaq aləmdə olan avtoriteti bundan sonra da möhkəmlənəcək. Azərbaycanın Avropa Şurası Nazirlər Komitəsinə sədrlik etməsi də bunun təsdiqidir. Rusiya Azərbaycana bu layihədə uğurlar arzulayır”.
Bu məqamda vurğulamaq yerinə düşər ki, müstəqil Azərbaycanın məqsədyönlü xarici siyasət kursunda ciddi önəm verdiyi dövlətlərdən biri də qonşu Rusiyadır. Bu ölkə ilə Azərbaycanı bir sıra tellər, o cümlədən tarixi əlaqələr, geniş quru və su sərhədləri və əlbəttəki, iqtisadi maraqlar bağlayır.
Qeyd edək ki, iki ölkə arasında əmtəə dövriyyəsi dünya ölkələrindəki iqtisadi çətinliklərə baxmayaraq, 2013-cü ilin yekunlarına görə 50 faizədək artaraq 2,6 milyard dollara çatıb. Perspektivdə əmtəə dövriyyəsinin 4 milyard dollara çatdırılması gözlənilir. Rusiya Federasiyasının 70-dən çox regionu Azərbaycan ilə sıx, işgüzar əlaqələr saxlayır. Azərbaycanda 500-dən çox Rusiya şirkəti işləyir, onların fəaliyyəti sosial-iqtisadi inkişaf üçün ən mühüm sahələrin geniş spektrini, o cümlədən yanacaq-energetika, avtomobil sənayesi, maliyyə, sığorta fəaliyyəti, səhiyyə və digər sahələri əhatə edir. Son vaxtlarda isə iki ölkənin birgə investisiya fondunun yaradılması məsələsi gündəmə gəlib.
Rusiya xarici işlər nazirinin müavini Q.Karasin mətbuata açıqlamasında eyni zamanda iki ölkə arasında siyasi, iqtisadi, humanitar və digər sahələrdə əlaqələrin getdikcə dərinləşməsindən məmnunluğunu ifadə edərək vurğulayıb ki, Azərbaycan-Rusiya münasibətlərindəki müsbət inkişaf qarşılıqlı hörmət və dostluq prinsipi əsasında qurulan möhkəm strateji əməkdaşlığın gücünü göstərir. Nazir müavini münasibətlərin gələcəyi barədə də nikbinliklə söhbət açıb: “Azərbaycan və Rusiya gələcəkdə də həm ikitərəfli əsaslarla, həm də beynəlxalq və regional forumlar çərçivəsində sıx əməkdaşlıq edəcək. Bizim ümumi məqsədimiz hər iki xalqın rifahını, Cənubi Qafqazda və Xəzər dənizində təhlükəsizliyi və sabitliyi təmin etməkdir”.
Mübariz ABDULLAYEV

Paylaş:

Baxılıb: 764 dəfə