Bir qrup xarici jurnalist Tərtər rayonuna səfər edib

Bakı:

26 °C

64 %

11 m/s

Əlaqə

AZ RU EN

Ana səhifə / Sosial / Bir qrup xarici jurnalist Tərtər rayonuna səfər edib

Bir qrup xarici jurnalist Tərtər rayonuna səfər edib

14.04.2018 [10:15]

Prezident seçkilərini müşahidə etmək məqsədilə Azərbaycana gəlmiş bir qrup xarici jurnalist cəbhə xəttində yerləşən kəndlərdə əhalinin yaşayışı, məcburi köçkünlər üçün yaradılan şəraitlə yaxından tanış olmaq məqsədilə aprelin 13-də Tərtər rayonuna səfər edib.
AZƏRTAC-ın bölgə müxbiri xəbər verir ki, “The Jerusalem Post”, “Hill and Fox News Latino”, “Agenzia Nova” və “Report Difesa” media qurumlarının nümayəndələri əvvəlcə Tərtər rayon İcra Hakimiyyətində olublar.
Tərtər rayon İcra Hakimiyyətinin başçısı Müstəqim Məmmədov qonaqlara rayon haqqında ətraflı məlumat verib. Bildirib ki, Tərtər düşmənlə 48 kilometr məsafədə təmas xəttində yerləşir. Ermənistan silahlı qüvvələrinin bölmələri tərəfindən atəşkəs rejiminin mütəmadi pozulması nəticəsində rayonun inzibati və yaşayış binalarına, əkin sahələrinə, mal-qaraya ciddi ziyan dəyir, əhalinin məişət işləri ilə məşğul olmasında çətinlik yaranır. Eyni zamanda, düşmənin təxribatları dinc sakinlər arasında xəsarət almalara və ölüm hallarına səbəb olur. İşğal altında olan ərazilərdə yay aylarında ermənilər tərəfindən yanğınların törədilməsi ətraf mühitə ziyan vurmaqla yanaşı, yırtıcı heyvanların və həşəratların rayon ərazisinə kütləvi miqrasiyasına gətirib çıxarır. Nəticədə taxıl zəmiləri və digər kənd təsərrüfatı məhsulları ziyanvericilər tərəfindən məhv edilir. Ermənilər işğal altında saxladıqları Sərsəng və Madagiz su anbarlarından gələn suyun qarşısını suvarma dövründə kəsirlər ki, bu da əkin sahələrinin suvarılmasında çətinliklər törədir. Qış fəslində isə suyu açaraq əkin sahələrinin və yaşayış məntəqələrinin su altında qalmasına səbəb olurlar. Çaylar vasitəsilə rayon ərazisinə partladıcı maddələr də axıdılır.
Müstəqim Məmmədov təəssüf hissi ilə qeyd edib ki, Ermənistan tərəfindən Azərbaycanın 20 faiz torpaqlarının işğal altında saxlanılmasına, əsrin faciəsi olan Xocalı soyqırımının törədilməsinə, bir milyondan çox soydaşımızın qaçqın və məcburi köçkün düşməsinə baxmayaraq, hələ də qərb dövlətləri və beynəlxalq təşkilatlar Ermənistanın bu hərəkətlərinə laqeyd yanaşırlar.
Görüşdə media nümayəndələrini maraqlandıran suallar cavablandırılıb. Qonaqlar səmimi qəbula və ətraflı məlumata görə minnətdarlıqlarını bildiriblər.
Xarici jurnalistlər sonra rayonun təmas xəttində yerləşən Qapanlı kəndində sakinlərlə görüşüb, məcburi köçkünlər üçün inşa edilən 1176 ailəlik yeni yaşayış kompleksində yaradılan şəraitlə tanış olub, Qarabağa köçürülmələrinin 150 illiyi münasibətilə Şıxarx qəsəbəsində ermənilərin özləri tərəfindən ucaldılmış “Marağa 150” abidəsinin qalıqlarına baxıblar.

Paylaş:

Baxılıb: 586 dəfə