Füzulidə rayon əhalisinin ərzaq məhsullarına olan tələbatı yerli istehsal hesabına ödənilə bilər

Bakı:

12 °C

76 %

1 m/s

Əlaqə

AZ RU EN

Ana səhifə / Sosial / Füzulidə rayon əhalisinin ərzaq məhsullarına olan tələbatı yerli istehsal hesabına ödənilə bilər

Füzulidə rayon əhalisinin ərzaq məhsullarına olan tələbatı yerli istehsal hesabına ödənilə bilər

04.02.2016 [10:11]

Azərbaycan Milli Məclisi sədrinin müavini Bahar Muradova fevralın 3-də Horadiz şəhərində Füzuli rayon ictimaiyyəti ilə görüşüb.
AZƏRTAC xəbər verir ki, görüşdən əvvəl Ümummilli lider Heydər Əliyevin Horadiz şəhərinin mərkəzində ucaldılmış abidəsi ziyarət olunub, önünə gül dəstələri düzülüb.
Muğam Mərkəzində keçirilən görüşdə yerli icra hakimiyyəti orqanlarının, bələdiyyələrin, ictimaiyyətin nümayəndələri, rayon fəalları, sahibkarlar iştirak ediblər. Görüşdə regionların 2014-2018-ci illərdə sosial-iqtisadi inkişafı Dövlət Proqramının icrasının ikinci ilinin yekunlarına həsr olunmuş konfransda Prezident İlham Əliyevin nitqindən irəli gələn məsələlər, verilən tapşırıqlar, nəzərdə tutulan tədbirlər barədə ətraflı bəhs olunub.
Füzuli rayon İcra Hakimiyyətinin başçısı Alı Alıyev çıxış edərək, dövlətimizin başçısının tapşırıqlarının icrası istiqamətində görülən işlər və qarşıda duran vəzifələrdən danışıb. Bildirib ki, Füzuli rayonunda yerli əhalinin kənd təsərrüfatı məhsulları ilə təminatı üçün lazımi şərait var. Münbit torpaqlar və suvarma suyu ilə təminat onu deməyə əsas verir ki, rayon əhalisinin ərzaq məhsullarına olan tələbatı yerli istehsal hesabına ödənilə bilər. Odur ki, bütün qüvvələr bu istiqamətdə səfərbər edilməli, kənd təsərrüfatı məhsullarının istehsalı artırılmalıdır. Qarşıda duran digər vəzifə isə rayon ərazisində sənaye parkının yaradılmasıdır.
Milli Məclis sədrinin müavini Bahar Muradova Prezidentin tapşırığı ilə bölgələrdə keçirilən görüşlərin əsas məqsədinin problemləri öyrənib həllinə nail olmaq olduğunu bildirib. Diqqətə çatdırıb ki, Prezident İlham Əliyev, ilk növbədə, atılacaq addımların qanunvericilik əsaslarının yaradılmasının vacibliyini vurğulayıb. Bu məqsədlə yeni dövrün islahatlarını aparmaq üçün layihə hazırlanıb Milli Məclisə təqdim edilib. Bunlar investisiyaların təşviqini, kənd təsərrüfatının inkişafını, iqtisadi proseslərin həyata keçirilməsinə maneçilik törədən müdaxilələrin aradan qaldırılmasını, sahibkarların azad şəkildə fəaliyyət göstərməsini tənzimləyən qanunvericilik dəyişiklikləridir.
Milli Məclis sədrinin müavini rayon iqtisadiyyatının inkişaf etdirilməsi, ərzaq məhsullarına tələbatın ödənilməsi, əhalinin sosial rifahının yaxşılaşdırılması məsələlərinə də toxunub. Bildirib ki, kənd təsərrüfatı və sahibkarlıq daha da inkişaf etdirilməli, torpaqlardan səmərəli istifadə olunmalı, sahibkarlar rayon iqtisadiyyatının inkişafına cəlb edilməli, iri təsərrüfatlar yaradılmalıdır.
Bahar Muradova ictimaiyyət nümayəndələrindən, sahibkarlardan rayonun inkişafı üçün təkliflər vermələrini, problemlərin həlli yollarının müzakirəsində fəal olmağa çağırıb.
Tədbirdə çıxış edən “Kraun KO 1” MMC-nin direktoru Elvüsal Mahmudov deyib ki, taxıl və toxum istehsalı sahəsində qarşıya qoyulan vəzifələrin yerinə yetirilməsi məqsədilə 2015-ci ildə Füzuli rayonu ərazisində yaradılan cəmiyyətin 11 min 789 hektar sahəsi var. 10 min hektar sahədə şum işləri aparılaraq toxumluq taxıl sortları əkilib. 2015-2016-cı il taxıl istehsalı dövründə əksəriyyəti məcburi köçkünlər olmaqla, 400 nəfərə yaxın insan işlə təmin edilib. Sahibkar buğda anbarlarının, inzibati binaların tikintisi və kommunikasiyaların quraşdırılması üçün müvafiq orqanlardan rəy alınmasına kömək göstərilməsini xahiş edib.
Toxumçuluq və tərəvəzçiliklə məşğul olan sahibkar Aydın Hüseynov isə rayonda 5 min tonluq meyvə-tərəvəz anbarının inşa edildiyini diqqətə çatdırıb. O, bölgələrdə kənd təsərrüfatı məhsullarının tədarükü müəssisələrinin yaradılmasını təklif edib.
Görüşdə digər çıxış edənlər göstərilən diqqət və qayğıya görə dövlətimizin başçısına minnətdarlıqlarını bildirib, rayonda un dəyirmanının tikintisi, pambıqçılığın inkişafı, qum-çınqıl istehsalı müəssisənin yaradılması ilə bağlı təkliflər irəli sürüblər.
Milli Məclis sədrinin müavini Bahar Muradova səsləndirilən müraciət və təkliflərin qeydiyyata alındığını, onların həllinə kömək göstəriləcəyini bildirib.

Paylaş:

Baxılıb: 727 dəfə