Tərəqqi yolu

Bakı:

21 °C

76 %

4 m/s

Əlaqə

AZ RU EN

Ana səhifə / YAP xəbərləri / Tərəqqi yolu

Tərəqqi yolu

11.06.2026 [12:51]

Müasir müstəqil Azərbaycan Ulu Öndər Heydər Əliyevin indiki və gələcək nəsillərə əmanəti, onun zəngin və çoxşaxəli irsi isə xalqımızın milli sərvətidir. 1993-2003-cü illərdə Azərbaycanın sürətli inkişafı bugünkü reallıqların bünövrəsidir. Həmin illərdə görülmüş işlər sayəsində Azərbaycan inkişaf yoluna qədəm qoydu, beynəlxalq aləmdə daxili siyasətlə bağlı bütün məsələlərdə öz prinsipial mövqeyini nümayiş etdirdi, dünyada böyük hörmətə malik oldu.

Ölkə daxilində başlanan islahatlar dövlətimiz üçün həlledici rol oynamışdır. Bütün həyatını canından artıq sevdiyi xalqına, Vətəninə həsr etmiş müdrik dövlət xadimi Ulu Öndər Heydər Əliyevin adı tariximizə müstəqilliyimizin memarı, yeni Azərbaycanın banisi kimi yazılıb. 1993-cü ilin 15 iyun tarixi gün, eyni zamanda, Azərbaycanın tənəzzüldən xilas olaraq tərəqqi yoluna çıxması, dünya miqyasında müstəqil siyasət həyata keçirən dövlət kimi tanınması, beynəlxalq aləmdə layiqli yerini tutması ilə səciyyələnir. Ulu Öndərin xalqımız və tariximiz qarşısında ən böyük xidmətləri kəskin geosiyasi ziddiyyətlərin mövcud olduğu bir şəraitdə Azərbaycan dövlətçiliyini xilas etməsində, ölkəmizi parçalanıb yox olmaq təhlükəsindən qurtarmasında idi. Ümummilli Lider Heydər Əliyev bu çağırışı etmişdir: “Mənim həyatım da, fəaliyyətim də yalnız və yalnız Azərbaycanın müstəqilliyinin qorunub saxlanmasına, ölkəmizin bu ağır vəziyyətdən çıxmasına həsr olunacaqdır”. Dahi şəxsiyyət Heydər Əliyev 1993-cü ildə xalqın təkidli tələbi ilə hakimiyyətə qayıdışından sonra ilk olaraq ölkədə sabitliyin yaradılmasına diqqət göstərdi. Bildirdi ki, sabitlik olmadan heç bir sosial-iqtisadi layihənin icrasından danışmaq mümkün deyil. Azərbaycan Ümummilli Liderin düşünülmüş və məqsədyönlü siyasəti nəticəsində qısa müddətdə sabitlik məkanına çevrildi. 1994-cü ilin 12 may tarixində Ulu Öndərin səyləri nəticəsində Ermənistanla atəşkəs sazişinin imzalanması Azərbaycanın bütün sahələrdə inkişafına yol açdı. Elə həmin ilin 20 sentyabr tarixində Ulu Öndər Heydər Əliyevin gərgin səyləri nəticəsində “Əsrin müqaviləsi” imzalandı. Azərbaycan xalqının ən böyük arzularından biri öz təbii sərvətlərinin əsl sahibinə çevrilmək idi. Ulu Öndər xalqın bu istəyini reallaşdırmaqla yanaşı, bu sərvətdən səmərəli istifadəni təmin edərək həm ölkəmizi daha da gücləndirdi, qüdrətləndirdi, həm də xalqın sosial müdafiəsinin gücləndirilməsi istiqamətində mühüm addımlar atdı. Ulu Öndər neftin xalqın ən böyük sərvəti, yalnız indiki deyil, gələcək nəsillərə də mənsub olduğunu önə çəkərək Azərbaycanın bugününə və gələcəyinə xidmət edən neft strategiyasını müəyyənləşdirdi. 1995-ci ilin noyabrında demokratik, hüquqi dövlətin təməlini təşkil edən yeni Konstitusiya qəbul olundu. Bu Konstitusiya dövlətimizin müstəqilliyinin, suverenliyinin və ərazi bütövlüyünün qorunması, hüquqi, dünyəvi dövlət quruculuğu, vətəndaşlarımızın layiqli həyat səviyyəsinin, dünya ölkələri ilə dostluq və əmin-amanlıq şəraitində əməkdaşlığın təmin edilməsi kimi ali niyyətlərin həyata keçirilməsi üçün mühüm qanunvericilik bazası rolunu oynadı. Ümummilli Liderin düşünülmüş və gələcəyə hesablanmış siyasəti nəticəsində Azərbaycan bütün sahələrdə davamlı inkişafa nail oldu. Xalqımızı vahid amal ətrafında birləşdirən azərbaycançılıq ideologiyasının formalaşdırılması, Azərbaycanın çoxəsrlik mənəvi-mədəni irsə sahib qədim diyar və sivilizasiyaların qovşağında yerləşən tolerantlıq məkanı kimi geniş şöhrət qazanması Ulu Öndər Heydər Əliyevin mükəmməl quruculuq proqramının tərkib hissələri kimi müəyyənləşdirildi. Nizami ordu yaradıldı, uğurlu xarici siyasətin nəticəsi olaraq Azərbaycanın müxtəlif dövlətlərlə istər ikitərfli, istərsə də beynəlxalq təşkilatlar daxilində əlaqələri yuksələn xətlə inkişaf etdi. 15 iyun 1993-cü ildən başlanan inkişaf, tərəqqi yolu Azərbaycanın yeni-yeni hədəflərə doğru inamla addımlamasını şərtləndirir. Ulu Öndərin ən böyük arzusu Azərbaycanı bütöv görmək idi. Prezident İlham Əliyev Onun bu arzusunu gerçəkləşdirdi. Hazırda tarixi Zəfəri, ərazi bütövlüyünün və suverenliyinin tam bərpası ilə regionda, dünya siyasətində yeniliklər yaradan Azərbaycan Prezident İlham Əliyevin rəhbərliyi ilə daha da qüdrətlənir, beynəlxalq münasibətlər sistemində mövqeyini möhkəmləndirir, söz sahibliyini artırır. Azərbaycan dünyaya sülh təcrübəsini təqdim edir. Xalqımız əmindir ki, Heydər Əliyev yolu bundan sonra da Azərbaycana möhtəşəm uğurlar qazandıracaq.

Nihad Pənahov

YAP Tovuz rayon təşkilatının sədri

Paylaş:

Baxılıb: 140 dəfə