Milli Qurtuluş Günü xalqımızın birlik, həmrəylik və dövlətçilik ənənələrinin rəmzidir

Bakı:

28 °C

54 %

10 m/s

Əlaqə

AZ RU EN

Ana səhifə / YAP xəbərləri / Milli Qurtuluş Günü xalqımızın birlik, həmrəylik və dövlətçilik ənənələrinin rəmzidir

Milli Qurtuluş Günü xalqımızın birlik, həmrəylik və dövlətçilik ənənələrinin rəmzidir

11.06.2026 [19:56]

Yaxın keçmişimizdə Azərbaycan xalqının tarixində mühüm əhəmiyyətə malik olan günlərdən biri də 15 İyun – Milli Qurtuluş Günüdür. Bu tarix xalqımızın dövlət müstəqilliyini qoruyub saxlamasında, ölkədə sabitliyin və inkişafın təmin olunmasında mühüm rol oynamışdır. 1993-cü ilin 15 iyun tarixində Ümummilli Lider Heydər Əliyevin xalqın tələbi ilə yenidən siyasi hakimiyyətə qayıdışı Azərbaycanı parçalanmaq və vətəndaş qarşıdurması təhlükəsindən xilas etmişdir.

Ötən əsrin 90-cı illərinin əvvəllərində Azərbaycan mürəkkəb və çətin dövr yaşayırdı. Ölkədə siyasi böhran, iqtisadi gerilik, idarəetmədə xaos hökm sürürdü. Ermənistanın Azərbaycana qarşı təcavüzü nəticəsində torpaqlarımız işğal olunur, xalqın gələcəyə inamı azalırdı. Belə bir ağır şəraitdə xalq öz xilaskarını görmək üçün Heydər Əliyevə üz tutdu. 1993-cü ilin iyun ayında Heydər Əliyevin Bakıya dəvət olunması və Azərbaycan Ali Sovetinin sədri seçilməsi ölkənin taleyində dönüş nöqtəsi oldu.

Milli Qurtuluş Günü Azərbaycan dövlətçiliyinin qorunmasının başlanğıcı hesab olunur. Ulu Öndərin uzaqgörən siyasəti nəticəsində ölkədə sabitlik yaradıldı, dövlət quruculuğu prosesi gücləndirildi və Azərbaycanın beynəlxalq əlaqələri genişləndi. Məhz həmin dövrdən etibarən iqtisadi inkişafın əsası qoyuldu, ordu quruculuğu sahəsində mühüm addımlar atıldı və xalqın dövlətə olan inamı bərpa edildi.

Bu gün Azərbaycan güclü, müstəqil və nüfuzlu dövlət kimi inkişaf edir. Prezident İlham Əliyev tərəfindən Ulu Öndərin siyasi kursunun uğurla davam etdirilməsi nəticəsində ölkəmiz böyük nailiyyətlər əldə etmişdir. Xüsusilə torpaqlarımızın işğaldan azad olunması Azərbaycan xalqının milli birliyinin və gücünün parlaq nümunəsidir.

15 İyun – Milli Qurtuluş Günü xalqımızın birlik, həmrəylik və dövlətçilik ənənələrinin rəmzidir. Bu əlamətdar tarix hər bir azərbaycanlı üçün böyük qürur mənbəyidir və gələcək nəsillərə dövlətimizin müstəqilliyini qorumağın nə qədər vacib olduğunu xatırladır.

1993-cü ildə əldə olunan milli qurtuluş Azərbaycanın gələcək inkişaf strategiyasının əsasını təşkil etmişdir. Bu gün ölkəmiz regionun ən güclü dövlətlərindən biri kimi beynəlxalq arenada öz mövqeyini daha da möhkəmləndirir. Xalqımız Milli Qurtuluş Gününü böyük ehtiramla qeyd edərək Ümummilli Lider Heydər Əliyevin dövlətçilik xidmətlərini daim yüksək qiymətləndirir.

Nazim Bünyatov

YAP Ağcabədi rayon təşkilatının sədr müavini

Paylaş:

Baxılıb: 376 dəfə