Şanlı tariximizdə Milli Qurtuluş günü

Bakı:

30 °C

51 %

11 m/s

Əlaqə

AZ RU EN

Ana səhifə / YAP xəbərləri / Şanlı tariximizdə Milli Qurtuluş günü

Şanlı tariximizdə Milli Qurtuluş günü

11.06.2026 [16:38]

Azərbaycan xalqının çoxəsrlik dövlətçilik tarixində müstəqillik ən böyük milli sərvət və ən ali dəyər hesab olunur. Müstəqillik xalqın azad yaşamaq, öz taleyini özü müəyyənləşdirmək, milli maraqlarını qorumaq və gələcəyini qurmaq hüququnun təcəssümüdür. Ümummilli Lider Heydər Əliyevin “Mənim həyatım da, fəaliyyətim də yalnız və yalnız Azərbaycanın müstəqilliyinin qorunub saxlanmasına, ölkəmizin bu ağır vəziyyətdən qalxmasına həsr olunacaqdır” fikri onun bütün siyasi fəaliyyətinin əsas qayəsini, dövlətçilik fəlsəfəsini və xalqa xidmət missiyasını özündə əks etdirir.

XX əsrin sonlarında Azərbaycan xalqı uzun illərdən sonra yenidən dövlət müstəqilliyinə qovuşdu. Lakin müstəqilliyin ilk illəri ölkəmiz üçün olduqca mürəkkəb və çətin dövr olmuşdur. Siyasi qeyri-sabitlik, iqtisadi tənəzzül, idarəetmədə yaranmış problemlər və Ermənistanın Azərbaycana qarşı apardığı işğalçılıq siyasəti ölkənin gələcəyini ciddi təhlükə altında qoymuşdu. Dövlət müstəqilliyinin itirilməsi təhlükəsi real xarakter almış, ölkədə xaos və anarxiya hökm sürməyə başlamışdı.

Belə bir ağır və taleyüklü mərhələdə xalqın təkidli tələbi ilə hakimiyyətə qayıdan Ulu Öndər Heydər Əliyev Azərbaycanın dövlət müstəqilliyinin qorunub saxlanılması və möhkəmləndirilməsi istiqamətində mühüm addımlar atdı. Onun uzaqgörən siyasəti nəticəsində ölkədə ictimai-siyasi sabitlik bərpa edildi, dövlət institutları gücləndirildi, qanunun aliliyi təmin olundu və milli həmrəylik mühiti yaradıldı. Məhz bu tədbirlər Azərbaycan dövlətinin gələcək inkişafının möhkəm təməlini formalaşdırdı.

Ulu Öndər Heydər Əliyev yaxşı bilirdi ki, müstəqilliyi əldə etmək nə qədər çətindirsə, onu qorumaq və möhkəmləndirmək daha böyük məsuliyyət tələb edir. Buna görə də o, dövlətçilik ideologiyasının formalaşdırılmasına, milli maraqların qorunmasına və vətəndaşların vətənpərvərlik ruhunda tərbiyəsinə xüsusi diqqət yetirirdi. Onun rəhbərliyi ilə həyata keçirilən islahatlar Azərbaycanın beynəlxalq nüfuzunun artmasına, iqtisadi inkişafına və dünya birliyində layiqli yer tutmasına şərait yaratdı.

1994-cü ildə imzalanmış “Əsrin müqaviləsi” Azərbaycanın iqtisadi müstəqilliyinin möhkəmləndirilməsi baxımından tarixi əhəmiyyət daşıyır. Bu müqavilə ölkəyə böyük investisiyaların cəlb edilməsinə, enerji sektorunun inkişafına və iqtisadi yüksəlişə geniş imkanlar yaratdı. Sonrakı illərdə həyata keçirilən uğurlu iqtisadi siyasət nəticəsində Azərbaycan regionun aparıcı dövlətlərindən birinə çevrildi.

Ulu Öndərin müəyyən etdiyi inkişaf strategiyası bu gün də uğurla davam etdirilir. Prezident İlham Əliyevin rəhbərliyi ilə Azərbaycanın beynəlxalq mövqeləri daha da güclənmiş, ölkəmiz mühüm siyasi və iqtisadi layihələrin təşəbbüskarı olmuşdur. Xüsusilə 2020-ci ildə Vətən müharibəsində qazanılan tarixi Zəfər Azərbaycanın ərazi bütövlüyünün bərpasını təmin etmiş və dövlətimizin qüdrətini bütün dünyaya nümayiş etdirmişdir. Bu qələbənin təməlində məhz Heydər Əliyevin yaratdığı güclü dövlətçilik ənənələri dayanır.

Bu gün hər bir Azərbaycan vətəndaşının əsas vəzifələrindən biri dövlət müstəqilliyini qorumaq, milli maraqlara sadiq olmaq və ölkəmizin inkişafına töhfə verməkdir. Gənc nəslin vətənpərvər ruhda böyüməsi, milli-mənəvi dəyərlərə hörmətlə yanaşması və dövlətçilik ənənələrini yaşatması müstəqilliyimizin əbədi olmasının ən vacib şərtlərindəndir.

Ulu Öndər Heydər Əliyevin “Mənim həyatım da, fəaliyyətim də yalnız və yalnız Azərbaycanın müstəqilliyinin qorunub saxlanmasına, ölkəmizin bu ağır vəziyyətdən qalxmasına həsr olunacaqdır” fikri Azərbaycan dövlətçiliyinin inkişaf yolunu müəyyən edən mühüm siyasi və mənəvi çağırışdır. Bu ideya bu gün də öz aktuallığını qoruyur və hər bir vətəndaşı müstəqil Azərbaycanın daha da güclənməsi naminə səylə çalışmağa səsləyir. Müstəqilliyimizin qorunması, dövlətimizin qüdrətinin artırılması və gələcək nəsillərə daha güclü Azərbaycan miras qoyulması hər birimizin müqəddəs borcudur.

Mən bir məktəbəqədər təhsil müəssisəsinin rəhbəri və Yeni Azərbaycan Partiyasının fəal üzvü olaraq fəxr edirəm ki, biz bu gün Ulu Öndərin bizə əmanət etdiyi müstəqil dövlətdə gələcəyimizin qurucularını tərbiyə edirik. Ulu Öndər Heydər Əliyev hər zaman vurğulayırdı ki, “Təhsil millətin gələcəyidir. ”Bizim bağçalarda atdığımız hər addım, uşaqlara aşıladığımız hər bir dəyər bu fəlsəfəyə söykənir. Biz körpələrimizə rəngləri öyrətməzdən əvvəl üçrəngli bayrağımızı sevməyi, hərfləri öyrətməzdən əvvəl Azərbaycan kəlməsini qürurla tələffüz etməyi öyrədirik. Çünki Milli Qurtuluş idealogiyasının yaşadılması məhz gənc nəslin vətənpərvər ruhda böyüməsindən asılıdır.

Bu gün Ulu Öndərin siyasi kursu möhtərəm Prezidentimiz, Yeni Azərbaycan Partiyasının Sədri Cənab İlham Əliyev tərəfindən ən yüksək səviyyədə davam etdirilir. Belə ki biz artıq, zəfər qazanmış ölkənin qürurlu vətəndaşlarıyıq. Bu böyük tarixi qələbə biz təhsil işçilərinin məsuliyyətini daha da artırır. Biz artıq uşaqlarımıza işğal tarixini deyil, zəfər tariximizi öyrədirik. Onları Ordumuzun, Dövlətimizin rəşadəti ruhunda tərbiyə edirik.

Yeni Azərbaycan Partiyasının sıralarında olmaq və dövlətimizin inkişafına məktəbəqədər təhsil sahəsində töhfə vermək bizim üçün böyük şərəfdir. Biz bundan sonra da var gücümüzlə çalışacaq, Ulu Öndər Heydər Əliyevin ideyalarına sadiq, sağlam və milli ruhlu nəsil yetişdirilməsi işini layiqincə davam etdirəcəyik. Bir daha Milli Qurtuluş Günümüzü təbrik edir, Dövlətimizə sülh, doğma Partiyamıza yeni-yeni uğurlar arzu edirik.

Səriyyə Əhmədova

Naxçıvan şəhər 10 nömrəli körpələr evi-uşaq bağçasının müdiri, YAP Naxçıvan şəhər təşkilatı üzrə ƏPT sədri

Paylaş:

Baxılıb: 327 dəfə