Müasir dövlət qulluğunun əsas prinsipləri

Bakı:

28 °C

54 %

10 m/s

Əlaqə

AZ RU EN

Ana səhifə / YAP xəbərləri / Müasir dövlət qulluğunun əsas prinsipləri

Müasir dövlət qulluğunun əsas prinsipləri

23.06.2026 [12:21]

İlqar İlyasov

Yeni Azərbaycan Partiyası Laçın rayon təşkilatının sədri

Azərbaycanda hər il 23 iyun tarixi Dövlət Qulluqçularının Peşə Bayramı Günü kimi təntənəli şəkildə qeyd olunur. Bu əlamətdar günün təsis edilməsi ölkəmizdə müasir dövlət idarəçiliyi sisteminin qurulmasında, dövlətçilik ənənələrinin möhkəmləndirilməsində və qanunun aliliyinin təmin olunmasında müstəsna xidmətləri olan dövlət qulluqçularının əməyinə verilən yüksək qiymətin və diqqətin bariz nümunəsidir. Bayrama dair hüquqi əsas Ümummilli Lider Heydər Əliyevin dövlət quruculuğu siyasəti və Prezident İlham Əliyevin 25 may 2006-cı il tarixli Sərəncamı ilə bağlıdır. Məhz həmin Sərəncama əsasən, Birləşmiş Millətlər Təşkilatı tərəfindən iyunun 23-nün Ümumdünya Dövlət Qulluğu Günü elan olunduğu nəzərə alınaraq, bu tarix Azərbaycanda da dövlət qulluqçularının peşə bayramı günü kimi rəsmiləşdirilmişdir.

Dövlət qulluğunun formalaşması və inkişaf tarixi müstəqil Azərbaycanın keçdiyi inkişaf yolu ilə sıx bağlıdır. Ulu Öndər Heydər Əliyevin rəhbərliyi altında ötən əsrin 90-cı illərinin ortalarından etibarən səmərəli dövlət idarəçiliyi aparatının yaradılması istiqamətində köklü islahatlara start verilmişdir. 21 iyul 2000-ci il tarixində "Dövlət qulluğu haqqında" Azərbaycan Respublikası Qanununun qəbul edilməsi bu sahədə vahid dövlət siyasətinin formalaşdırılmasında, dövlət qulluqçularının hüquqi statusunun, hüquq və vəzifələrinin müəyyən edilməsində tarixi bir addım olmuşdur. Bu qanun dövlət idarəçiliyində şəffaflığın artırılması, qanunçuluğun qorunması və kadr potensialının intellektual meyarlar əsasında formalaşdırılması üçün möhkəm hüquqi baza yaratmışdır.

Müasir dövrdə Prezident İlham Əliyevin rəhbərliyi ilə həyata keçirilən genişmiqyaslı islahatlar dövlət qulluğu sistemini daha da təkmilləşdirmiş və beynəlxalq standartlara uyğunlaşdırmışdır. Bu gün Azərbaycanda dövlət qulluğuna qəbul prosesi tamamilə şəffaf, obyektiv və müsabiqə əsasında, Dövlət İmtahan Mərkəzi tərəfindən keçirilən test imtahanları və müsahibələr vasitəsilə reallaşdırılır. Bu sistem gənclərin öz bilik və bacarıqlarına güvənərək dövlət idarəçiliyində təmsil olunmalarına, idarəetmədə meritokratiya, yəni ləyaqət və istedad prinsiplərinin bərqərar olmasına geniş imkanlar açır. Dövlət idarəçiliyində rəqəmsallaşmanın sürətlənməsi, "Elektron hökumət" layihələrinin genişlənməsi və "ASAN xidmət" modelinin uğurlu fəaliyyəti dövlət qulluqçularının vətəndaşlarla münasibətlərində yeni, daha şəffaf və humanist mədəniyyətin əsasını qoymuşdur.

Dövlət qulluqçusu olmaq təkcə peşə fəaliyyəti deyil, eyni zamanda böyük bir məsuliyyət, xalqa və dövlətə sədaqətlə xidmət etmək missiyasıdır. Dövlət qulluqçusunun üzərinə düşən ən mühüm vəzifə vətəndaşların hüquq və azadlıqlarını qorumaq, onlara vicdanla xidmət göstərmək və dövlətin maraqlarını hər şeydən uca tutmaqdır. Dövlət başçısının qeyd etdiyi kimi, dövlət məmurları vətəndaşların xidmətçiləridir və onların fəaliyyəti cəmiyyətin rifahına, ölkənin qüdrətlənməsinə yönəlməlidir. Bu baxımdan, dövlət qulluqçularının etik davranış qaydalarına əməl etməsi, peşəkarlığı, humanistliyi və obyektivliyi dövlət aparatına olan ictimai etimadın əsas sütununu təşkil edir.

Prezident İlham Əliyev dövlət qulluqçularının fəaliyyətinə dair çıxışlarında dəfələrlə vurğulamışdır ki, dövlət məmuru vətəndaşlara xidmət etməli, onların problemlərinin həllinə həssas yanaşmalıdır. Dövlət başçısının qeyd etdiyi kimi, “məmur xalqın xidmətçisidir”. Bu prinsip dövlət qulluğunun mahiyyətini müəyyən edir. Dövlət qulluqçusu fəaliyyətində qanunçuluğu, ədaləti, şəffaflığı və vətəndaş məmnunluğunu əsas tutmalı, dövlət-vətəndaş münasibətlərinin möhkəmlənməsinə və idarəetmənin səmərəliliyinə töhfə verməlidir.

Hər il 23 iyun tarixində peşə bayramı ilə əlaqədar olaraq Azərbaycan Respublikasının Prezidenti tərəfindən dövlət qulluğunda səmərəli fəaliyyəti ilə fərqlənən, dövlət quruculuğunda xüsusi xidmətləri olan bir qrup dövlət qulluqçusu fəxri adlar, orden və medallarla təltif edilir. Bu, dövlətimizin öz işçilərinə göstərdiyi diqqət və qayğının, həmçinin onların çətin və məsuliyyətli əməyinə verilən yüksək dəyərin təzahürüdür. Hazırda işğaldan azad edilmiş Qarabağ və Şərqi Zəngəzurda aparılan nəhəng bərpa-quruculuq işlərində, yeni idarəetmə modelinin tətbiqində də dövlət qulluqçuları fəal iştirak edir, dövlətimizin gücünü və suverenliyini bütün regionda təmsil edirlər. Dövlət Qulluqçularının Peşə Bayramı Günü bu şərəfli idarəetmə sistemində çalışan hər bir kəsin vətənpərvərlik, dürüstlük və peşəkarlık prinsipləri ətrafında daha sıx birləşdiyi rəmzi bir gündür.

Paylaş:

Baxılıb: 296 dəfə