Övladlarınızı “ağ ölüm”ün caynağından qoruyun!

Bakı:

23 °C

60 %

5 m/s

Əlaqə

AZ RU EN

Ana səhifə / Xəbər lenti / Övladlarınızı “ağ ölüm”ün caynağından qoruyun!

Övladlarınızı “ağ ölüm”ün caynağından qoruyun!

15.04.2022 [10:17]

Mikayıl

Uşaqlar narkotik biznesinin ən müdafiəsiz hədəfləridir. Ailələrdə yaranan psixoloji çətinliklər və valideyn nəzarətsizliyi ucbatından uşaqlar arasında narkotik maddələrə aludəçilik yaranır. Araşdırmalara görə, dünyada 275 milyondan çox narkotik maddə istifadəçisi var. Onların 40-45 faizi qadın və uşaqlardır. Narkoloqların sözlərinə görə, dünyada olduğu kimi, ölkəmizdə də məktəbli uşaqlar arasında narkotik istifadəçiləri var. Uşaqlar arasında narkotik istifadəçilərinə 12-13 yaşdan etibarən rast gəlinir. Aludəçilərin bir qismini isə qızlar təşkil edir. Çox təəssüf ki, narkotik maddə istifadə edən qızların sayı durmadan artır.

Mütəxəssislərin fikrincə, təhsil müəssisələri narkomaniya ilə mübarizədə fəal iştirak etməlidir. Qoruyucu faktorların arasında məktəbdə narkomaniya və narkotik maddələr haqqında düzgün maarifləndirmənin aparılması durur. Pedaqoq Aliyə Baxışova deyir ki, narkomaniya ilə mübarizədə ailə mühiti olduqca böyük əhəmiyyət kəsb etsə də, məktəblərdə təlim-tərbiyə sisteminin düzgün təşkili də mühüm rol oynayır. Bu baxımdan təhsil işçilərinin üzərinə daha böyük vəzifələr qoyur: “Təcrübə göstərib ki, narkotik maddələrdən istifadə etmiş şagirdlər digərləri ilə müqayisədə dərslərini 45 faiz daha gec mənimsəyirlər. Bu bəlaya qarşı mübarizə təkcə rəsmi dövlət qurumlarının və hüquq mühafizə orqanlarının xidmətləri ilə məhdudlaşmamalıdır. Narkotiklərin istifadəsinin qarşısının alınması ilə bağlı psixo-pedaqoji xidmət gücləndirilməli, tədris proqramlarına bu məsələ ilə bağlı mövzular daxil edilməli, şagirdlərlə söhbətlər və görüşlər keçirilməlidir. Bununla yanaşı, valideynlər də öz məsuliyyətlərini artırmalı, övladlarını narkotik maddələrin təsiri altına düşməkdən qorumalıdırlar”.

Pedaqoq valideynləri xəbərdar edir ki, valideyn diqqətli olarsa, uşağın müəyyən davranış və əlamətlərindən onun narkotik maddələrin aludəçisi olduğunu anlaya bilər: “ Deyirlər, övladınıza dost kimi yanaşın. Məncə, uşaqlara elə ana-ata kimi yanaşmaq lazımdır. Unutmayaq ki, möhkəm ailənin təməli onun qayda-qanunlarıdır. Uşaqlarınıza düzgün nümunə olun, onlara lazımi diqqət və qayğı göstərin, daim yanında olduğunuzu hiss etdirin. Əfsuslar olsun ki, bəzən valideynlər öz üzərilərinə düşən sosial və mənəvi məsuliyyəti tam mənası ilə dərk etmirlər. Sosial bəlanı dəf etmək üçün hər birimiz ona öz töhfəmizi verməliyik”.

Sonda qeyd edək ki, ölkəmizin bu problemlə mübarizə aparmaq üçün güclü qanunvericilik bazası mövcuddur. Ölkəmiz öz müstəqilliyinə qovuşduqdan sonra bütün sahələrdə olduğu kimi, narkomanlıq və narkotik vasitələrin qanunsuz dövriyyəsi sahəsində də ardıcıl və məqsədyönlü addımlar atılıb.

Son günlərdə həyata keçirilən əməliyyatlar nəticəsində külli miqdarda narkotik vasitə ələ keçirilib. Xüsusilə də, İran sərhədindən ölkəmizə narkotik vasitələri? keçirilməsi müşahidə edilib.

Mövzunu davam etdirəcəyik.

Paylaş:

Baxılıb: 714 dəfə