Sabirabadda "Müstəqilliyimizin, sabitliyimizin və inkişafımızın başlanğıcı" mövzusunda təntənəli tədbir keçirilib

Bakı:

26 °C

51 %

3 m/s

AZ RU EN

Ana səhifə / YAP xəbərləri / Sabirabadda "Müstəqilliyimizin, sabitliyimizin və inkişafımızın başlanğıcı" mövzusunda təntənəli tədbir keçirilib

Sabirabadda "Müstəqilliyimizin, sabitliyimizin və inkişafımızın başlanğıcı" mövzusunda təntənəli tədbir keçirilib

12.06.2026 [11:12]

Sabirabad Rayon İcra Hakimiyyəti və Yeni Azərbaycan Partiyası Sabirabad rayon təşkilatının birgə təşkilatçılığı ilə 15 İyun – Milli Qurtuluş Gününə həsr olunmuş "Müstəqilliyimizin, sabitliyimizin və inkişafımızın başlanğıcı" mövzusunda təntənəli tədbir keçirilib.

İlk öncə müasir müstəqil Azərbaycan dövlətinin qurucusu, Ümummilli Lider Heydər Əliyevin rayonda ucaldılmış abidəsi ziyarət olunub, önünə tər gül dəstələri düzülərək dahi şəxsiyyətin əziz xatirəsinə dərin ehtiram ifadə edilib.

Tədbir Ümummilli Lider Heydər Əliyevin və torpaqlarımızın azadlığı uğrunda canlarından keçmiş şəhidlərimizin əziz xatirəsinin bir dəqiqəlik sükutla yad edilməsi ilə başlayıb. Ardınca Azərbaycan Respublikasının Dövlət Himni ilə tədbir açıq elan edilib.

Tədbirdə geniş məruzə ilə çıxış edən Sabirabad Rayon İcra Hakimiyyətinin başçısı Siraqəddin Cabbarov 15 İyun gününün Azərbaycan xalqının taleyində və dövlətçilik tarixində dönüş nöqtəsi olduğunu bildirib. İcra başçısı qeyd edib ki, 1993-cü ildə ölkədə hökm sürən daxili xaos, anarxiya və iqtisadi böhran fonunda xalqın təkidli tələbi ilə ulu öndər Heydər Əliyevin yenidən hakimiyyətə qayıdışı Azərbaycanı parçalanmaqdan və məhv olmaq təhlükəsindən xilas etdi. Siraqəddin Cabbarov ulu öndərin qətiyyəti sayəsində ölkədə daxili sabitliyin bərqərar olduğunu, ordunun gücləndirildiyini və bugünkü qüdrətli Azərbaycanın, o cümlədən işğaldan azad edilmiş torpaqlarımızda dalğalanan üçrəngli bayrağımızın məhz həmin xilaskarlıq missiyasının məntiqi nəticəsi olduğunu xüsusi vurğulayıb.

Daha sonra Yeni Azərbaycan Partiyası Sabirabad rayon təşkilatının sədri Varis Rüstəmov çıxış edərək Milli Qurtuluş Gününün siyasi və tarixi əhəmiyyətinə toxunub. YAP rayon təşkilatının sədri diqqətə çatdırıb ki, ulu öndərin əsasını qoyduğu dövlətçilik ideologiyası və Yeni Azərbaycan Partiyasının fəaliyyəti ölkəmizin inkişaf lokomotivinə çevrilmişdir. Varis Rüstəmov Heydər Əliyev siyasi kursunun bu gün möhtərəm Prezident İlham Əliyev tərəfindən böyük uğurla davam etdirildiyini, Azərbaycanın regionun ən güclü dövləti statusunu qazandığını və partiya fəallarının hər zaman dövlət maraqlarının qorunmasında öndə getdiklərini ifadə edib.

Rəsmi çıxışlardan sonra rayonun ictimai-siyasi, mədəni və sosial həyatında fəal iştirak edən, öz sahəsində uğurları ilə fərqlənən bir qrup şəxsə fəxri fərmanlar və təşəkkürnamələr təqdim olunub. Tədbirin rəsmi hissəsi yekunlaşdıqdan sonra qonaqların şərəfinə geniş ziyafət verilib və tədbir musiqiçilərin ifasında maraqlı bədii-musiqili hissə ilə davam edib.

Paylaş:

Baxılıb: 157 dəfə